2020 - ଗପୁ


ଯେତେ ଗପିଲେ ବି ମୁଁ ଗପୁଥିବି ।

Shubhapallaba free eMagazine and online web Portal

Wednesday, 16 December 2020

ଗୋଲାପ... - କଲେଜଡାଏରୀ

ସଂଗ୍ରାମ କେଶରୀ ସେନାପତି 9:37 am 0
ଗୋଲାପ... - କଲେଜଡାଏରୀ
Golapa - College Diary - ଗୋଲାପ... - କଲେଜଡାଏରୀ

ତୁମକୁ ଦେବାପାଇଁ କେବେ ବି ଗୋଲାପ କିଣିନାହିଁ,
କାଳେ ମଉଳିଗଲେ କେଉଁଠି ଫପୋଡ଼ିଦେବ ବୋଲି ।

ହେଲେ ତମେ ଦେଇଥିବା ପ୍ରତିଟି ଗୋଲାପକୁ ଆଜି ସାଇତି ରଖିଛି,
ଏବେ ବି କଲେଜ ଡାଏରୀ ଖୋଲିଲେ ସେ ମଉଳା ଗୋପାଲ ଝଲସୁଛି ।

Wednesday, 11 November 2020

ସେ ଆଉ ତାଙ୍କ ଧୂଆଁ

ସଂଗ୍ରାମ କେଶରୀ ସେନାପତି 9:56 am 0
ସେ ଆଉ ତାଙ୍କ ଧୂଆଁ
Se Au Tanka Duan - College Diary - ସେ ଆଉ ତାଙ୍କ ଧୁଆଁ

ଇଏ ମୋର ସେ କଲେଜ ବେଳର କଥା, ଯେତେବେଳକୁ ମୁଁ କଲେଜରେ ତିନିବର୍ଷ ପାଠ ପଢ଼ା ଶେଷ କରିବାକୁ ବସିଥିଲି । ଇଞ୍ଜିନିୟିରଂ କଲେଜରେ ଯୁଗ୍ମ ସେମିଷ୍ଟାରରେ ପାଠପଢ଼ା କମ୍ ଥାଏ ଆଉ ବାକି ସବୁ ଜିନିଷ ଅଧିକ ଥାଏ । ଯଦିଓ କଲେଜ କ୍ୟାମ୍ପସରେ ସବୁବେଳେ ବସନ୍ତ ଋତୁ ଚାଲିଥାଏ, କିନ୍ତୁ ଏହି ସମୟରେ ଦୁଇଟି ବସନ୍ତ ଦେଖିବାକୁ ମିଳେ । ଏମିତି ଏକ ଦ୍ୱେତ ବସନ୍ତର ସୁଲୁସୁଲିଆ ପବନ ଖାଇବାକୁ ମୁଁ ଏକ ଗଛ ମୂଳରେ ବସିଥାଏ । ହଠାତ୍ ଗୋଟିଏ ଝିଅ ଆସି ମୋତେ ଲାଇଟର୍ ମାଗିଲା ।

ଯଦିଓ ମୋ ପାଖରେ ଲାଇଟର୍ ନଥିଲା, ତଥାପି ମୁଁ ଖୋଜିବାର ମିଛ ଅଭିନୟ ଟିକିଏ କଲି । କରିନଥାନ୍ତି ବା କେମିତି, ସେ ପରା ସେହି ଝିଅ ଯାହାକୁ ଦେଖିଲେ ମୋର ହୃଦ୍‌ସ୍ପନ୍ଦନ ଆପେ ଆପେ ଟିକେ ବଢ଼ିଯାଏ, ଯାହାକୁ ଦେଖିବାକୁ ମୁଁ ଅନେକ ସମୟରେ କଲେଜ ଯାଇବି କି ଅନୁପସ୍ଥିତ ରୁହେ, ଯାହା ସହ କଥା ହେବା ପାଇଁ ଚେଷ୍ଟା କରି ମଧ୍ୟ କେବେ କଥା ହେବାର ସାହାସ ଜୁଟାଇ ପାରିନାହିଁ । ଆଉ ସେ ଆଜି ପୁଣି ମୋ ସହ ତା' ଆଡ଼ୁ ଆଗ କଥା ହେଇଛି, ତା' ସାଙ୍ଗରେ ପୁଣି କିଛି ଗୋଟିଏ ଜିନିଷ ମାଗୁଛି; ସତେ ଯେମିତି ସେ ଲାଇଟର୍ ନୁହେଁ ମୋର ସେ ତୀବ୍ର ଗତିରେ ଚାଲୁଥିବା ହୃଦୟଟା ମାଗୁଛି ।

ମୋତେ ତ ଜଣାଥିଲା କି ମୋ ପାଖରେ ଲାଇଟ୍‌ର୍ ନାହିଁ, ତଥାପି ତା' ସାଙ୍ଗରେ କଥା ହେବା ବାହାନାରେ ମନା କରିବା ପୂର୍ବରୁ ପଚାରିଦେଲି,

- ଲାଇଟ‌ର୍ କ'ଣ ଦରକାର ଥିଲା କି?
- ସିଗାରେଟ୍ ଜଲାଇବାକୁ ।
- ସିଗାରେଟ୍???
- ହଁ, କ'ଣ ଅସୁବିଧା ଅଛି କି?
- ମୁଁ କ'ଣ କହୁଥିଲି କି...
- ଥାଉ କିଛି କହିବା ଦରକାର ନାହିଁ, ଝିଅ ହେଲି ବୋଲି କ'ଣ ସିଗାରେଟ୍ ଟାଣି ପାରିବିନି କି?
- ନାହିଁ ସେ କଥା ମୁଁ କହୁନି, କିନ୍ତୁ କଲେଜରେ?
- ହଁ କଲେଜ ହେଲା ତ କ'ଣ ହେଇଗଲା?

ଏତିକିବେଳକୁ ମୁଁ ମୋର ବ୍ୟାଗ୍ ଆଉ ପକେଟ୍ ସବୁଠି ଖୋଜିବାର ଅଭିନୟ କରିସାରିଥାଏ, ଅଧିକ ସମୟ ନେଇ ଶେଷରେ ମନା କଲେ, ହୁଏତ ସେ ଆହୁରି ରାଗିଯିବ, ତେଣୁ ବାଧ୍ୟ ହୋଇ ଏହି କଥୋପକଥନକୁ ପୂର୍ଣ୍ଣଛେଦ ପକାଇବାକୁ ଯାଇ କହିଲି, "ନାହିଁ, ମୋ ପାଖେ କାଇଁ ନାହିଁ, ବୋଧେ ରୁମ୍‌ରେ ରହିଯାଇଥିବ ।"

ଏତିକି ଶୁଣିସାରି ମୁହଁକୁ ଛିଞ୍ଚାଡ଼ି ସେ ଯିବାକୁ ଉଦ୍ୟତ ଧୀରେ ଧୀରେ ବୋଧେ ମୋତେ କିଛି ଗାଳି କରି ଯିବାକୁ ଉଦ୍ୟତ ହେଲା । ଆଉ ସେ ବୁଲିପଡ଼ିକି ଯିବାବେଳକୁ ମୁଁ ଅତି ନମ୍ର ସ୍ୱରରେ କହଲି, "ସରି ।"

ମୋତେ ଲାଗିଥିଲା, ମୋର ସେ ସରି କହିବାରେ ହୁଏତ ଏହି କଥୋପକଥନ ସରିଗଲା, କିନ୍ତୁ ସେ ସରି ଶୁଣିବାପରେ ଟିକିଏ ରହିଗଲା ଆଉ ପୁଣିଥରେ ମୋ ପାଖକୁ ଫେରିକି ଆସିଲା ଆଉ ମୁଁ ବସିଥିବା ସେ ଛୋଟ ସିମେଣ୍ଟ ବେଞ୍ଚଟି ଉପରେ ବସିଲା ।

ଯାହା ସହ କଥା ହେବାକୁ ଏତେ ଦିନ ଧରି ଚେଷ୍ଟା କରି ଆସୁଥିଲି, ଆଉ ସେ ପୁଣି ମୋ ପାଖରେ ବସିଛି, ହେଲେ କଥୋପକଥନ ଆରମ୍ଭ କରିବାକୁ ମୁଁ ଶବ୍ଦ କିଛି ପାଉନଥିଲି । ପ୍ରତ୍ୟେକ ଦିନ ରାତିରେ ଡାଏରୀରେ ତା' ବିଷୟରେ ଲେଖିଲାବେଳେ ଦୂରରୁ ତା'ର ପ୍ରତ୍ୟେକ ନିଶ୍ୱାସକୁ ବର୍ଣ୍ଣନା କରିପାରୁଥିଲି, କିନ୍ତୁ ଏବେ ଅତି ନିକଟରୁ ସେ ନିଶ୍ୱାସକୁ କାହିଁକି ସେମିତି ଅନୁଭବ କରିପାରୁନାହିଁ? ଅବଶ୍ୟ ଅନୁଭବ କରିନପାରିବାର କାରଣ ଥିଲା, ସେ ନିଶ୍ୱାସରେ ଭାସି ଆସୁଥିବା ସେ ସିଗାରେଟ୍‌ର ଧୂଆଁ । ପୂର୍ବରୁ ଦୂରରୁ ମୁଁ ଯେଉଁ ପ୍ରେମର ଧୂଆଁକୁ ଅନୁଭବ କରୁଥିଲି, ଆଜି ତାହା ସତେ ଯେମିତି ସେ ସିଗାରେଟ୍‌ର ଧୂଆଁରେ ଜଳି ଯାଇଥିଲା । ଏମିତି ଲାଗୁଥିଲା କି ପୂର୍ବରୁ ସେ ୨/୩ଟି ଏକାସାଙ୍ଗରେ ଜଳାଇଥିଲା ।

ଏଥର ସେ ତା'ଆଡ଼ୁ ନୀରବତାକୁ ଭଙ୍ଗ କରି ମୋତେ ପଚାରିଲା,

- ତୁ କାହାକୁ କେବେ ପ୍ରେମ କରିଛୁ?
- ହଁ, କିନ୍ତୁ କାହିଁକି?
- କେବେ ପ୍ରେମରେ ଆଘାତ ପାଇଛୁ?
- ନାହିଁ ଏବେଯାଏଁ ତ ପାଇନାହିଁ ।
- ତା'ହେଲେ ତୁ କି ପ୍ରେମ କରୁଛୁ?
- ମୋର ପରା ଏକତରଫା ପ୍ରେମ, ଯେଉଁଠି ପାଇବାର ଆଶା ନାହିଁ, ଖାଲି ପ୍ରେମ କରିବାର ଆଶା ଅଛି ।
- ବଡ଼ ଭାଗ୍ୟବାନ ତା'ହେଲେ ।
- ହଁ ସେବେଯାଏଁ, ଯେବେଯାଏଁ ଏହି ଏକତରଫା ପ୍ରେମଟା ଦୁଇଆଡ଼ୁ ହେବାର ଦେଖାଯାଉଥିବ ।
- କେବେ ଆଘାତ ପାଇଲେ ଜାଣିବୁ ତା'ହେଲେ ।
- ଆପଣ କାହାକୁ ପ୍ରେମ କରୁଛନ୍ତି କି?
- ହଁ.... କରୁଥିଲି ।

ଏ କରୁଥିଲି ପଦକ ଶୁଣିକି ସତେ ଯେମିତି ମୋର ଏ ରକ୍ତମାଂସ ଶରୀରଟା ଏକ ଫୁଲ ଭରା ସବୁଜ ଉଦ୍ୟାନ ପାଲଟିଯାଇଥିଲା ଆଉ ମୋର ଆତ୍ମା ଗୋଟିଏ ପ୍ରଜାପତି ହୋଇ ତା' ଭିତରେ ମନଖୋଲା ଉଡ଼ିବୁଲୁଥିଲା ।

- କରୁଥିଲି ମାନେ?
- ଏବେ ସେ ଆଉ କାହା ସାଥୀରେ ।
- ଆଉ ଏ ସିଗାରେଟ୍?
- ତା'ର ସିଗାରେଟ୍ ଭାରି ପସନ୍ଦ ଥିଲା, ମୁଁ ତାକୁ ସବୁବେଳେ କିନ୍ତୁ ସିଗାରେଟ୍ ଟାଣିବାକୁ ବାରଣ କରୁଥିଲି । ବୋଧେ ସେଇଥିପାଇଁ ସେ ମୋ ଠାରୁ ଦୂରେଇଗଲା ।
- ଆଉ ସେ ଗଲା ପରେ ଆପଣ ନିଜେ ଆରମ୍ଭ କରିଦେଲେ ।
- ହଁ ।
- କିନ୍ତୁ କାହିଁକି?
- ମୁଁ ତାକୁ ଭୁଲିବାକୁ ଚାହିଁଲେ ବି ପାରୁନାହିଁ, ସେଇଥିପାଇଁ ଏହି ସିଗାରେଟ୍ ଟାଣୁଛି, ହୁଏତ ଏହାର ଧୂଆଁରେ ତା'ର ପ୍ରେମର ଧୂଆଁ ମିଳେଇଯିବ ।
- କିନ୍ତୁ, ଏ ଧୂଆଁ କ'ଣ ତାଙ୍କ କଥା ଭୁଲିବାକୁ ଦେଉଛି?
- ନାହିଁ, ହେଲେ ଏବେ ବି ମୁଁ ଚେଷ୍ଟା ଜାରି ରଖିଛି ।
- ଗୋଟିଏ କଥା କହିବି?
- ହଁ କହ, ଶୁଣିବାକୁ ତ ବସିଛି ।
- ଆପଣ ତାକୁ ଭୁଲିବାକୁ ଏ ସିଗାରେଟର ଧୂଆଁକୁ ଅନୁଭବ କରୁଛନ୍ତି, କିନ୍ତୁ କେବେ ଭାବିଛନ୍ତି ସେ ଧୂଆଁରେ ପୁଣି ଆପଣ କାହାକୁ ଅନୁଭବ କରୁଛନ୍ତି?
- ତାକୁ?
- ହଁ, ଧୂଆଁର ପ୍ରତ୍ୟେକ କଣିକାରେ ତାଙ୍କର ସେ ପ୍ରେମକୁ ଆପଣ ଖୋଜୁଛନ୍ତି, ସେଇଥିପାଇଁ ତାଙ୍କୁ କେବେ ଭୁଲିପାରୁନାହାନ୍ତି ।
- ଯେଉଁ ଧୂଆଁର ଗନ୍ଧକୁ ମୁଁ ଏତେ ଘୃଣା କରୁଥିଲି, ସେ ଧୂଆଁରେ କେମିତି ମୁଁ ତାକୁ ଖୋଜିବି?
- ଏ ପ୍ରେମ ପରା ଏମିତି ଏକ ଅନୁଭବ, ଯିଏକୁ ଶତ୍ରୁକୁ ବି ନିଜର କରେଇଦେବେ ଆଉ ଏ ତ ସାମାନ୍ୟ ଧୂଆଁଟିକକ ।

ଏହା ପରେ ସେ କିଛି ନକହି ସିଧା ଉଠିପଡ଼ି ଚାଲଗିଲା ଆଉ ଗଲାବେଳେ ହାତରେ ଧରିଥିବା ସେ ସିଗାରେଟ ଖଣ୍ଡଟିକୁ ସେ ବେଞ୍ଚ ଉପରେ ଛାଡ଼ିଦେଇଗଲା । ହୁଏତ ଏବେ ମୋତେ ତା'ର ସେ ସ୍ୱାଦ ଚଖେଇବାକୁ ଚାହୁଁଥିଲା ।

Saturday, 21 March 2020

କରୋନା କାହାଣୀ: ଇଟାଲୀରେ ୨୪ ଘଣ୍ଟାରେ ଗଲାଣି ୬୨୭ ଜୀବନ

ସଂଗ୍ରାମ କେଶରୀ ସେନାପତି 10:00 pm 0
କରୋନା କାହାଣୀ: ଇଟାଲୀରେ ୨୪ ଘଣ୍ଟାରେ ଗଲାଣି ୬୨୭ ଜୀବନ

କରୋନାର ଭୟାବହତା ଧୀରେ ଧୀରେ ବଢ଼ିବାରେ ଲାଗିଛି । ଏବେ ତ ଇଟାଲୀରେ ସ୍ଥିତି ସାଂଘାତିକ ହେବାରେ ଲାଗିଛି; ମାତ୍ର ୨୪ ଘଣ୍ଟାରେ ୬୨୭ ଜଣଙ୍କର ମୃତ୍ୟୁ ସାରା ବିଶ୍ୱକୁ ଚିନ୍ତାରେ ପକାଇଦେଇଛି । ବିଶ୍ୱଯୁଦ୍ଧ ସମୟରେ ମଧ୍ୟ ଏକାଦିନେ ଏତେ ଲୋକ ମୃତ୍ୟବରଣ କରିନଥିଲେ, ଆଉ ଏତେ ସଂଖ୍ୟକ ମୃତ୍ୟୁରେ ଦେଖିକି ବି ଭିତରେ ଥିବା ଡର ବଢ଼ିବାରେ ଲାଗିଛି ଆଉ ଭାରତରେ ଆକ୍ରନ୍ତଙ୍କ ସଂଖ୍ୟା ମଧ୍ୟ । ଭାରତର ମାୟାନଗରୀ ମୁମ୍ବାଇ ଏବେ ବନ୍ଦ ହେଇଯାଇଛି, ସେୟାର ମାର୍କେଟର ସ୍ଥିତି ମଧ୍ୟ ଗମ୍ଭୀର ହେବାରେ ଲାଗିଛି । ସମଗ୍ର ଭାରତ ବର୍ଷରେ ଆକ୍ରାନ୍ତଙ୍କ ସଂଖ୍ୟା ୩୦୦ ଛୁଇଁବାକୁ ବସିଲାଣି ।

ଯଦିଓ ଓଡ଼ିଶାରେ ସବୁ ସ୍କୁଲ୍ ଓ ଶିକ୍ଷାନୁଷ୍ଠାନ ବନ୍ଦ ହୋଇଯାଇଛି, କିନ୍ତୁ ଏସ୍‌.ସି.ଏସ୍.ଟି. ଏବଂ ଦିବ୍ୟାଙ୍ଗ ହଷ୍ଟେଲ ସବୁ ବନ୍ଦ ହୋଇନଥିଲା; ସେଗୁଡ଼ିକ ମଧ୍ୟ ଆସନ୍ତା ମାର୍ଚ୍ଚ ୨୫ରୁ ବନ୍ଦ କରିଦିଆଯିବ । ଧୀରେ ଧୀରେ ସମଗ୍ର ଭାରତ ଏବେ ଗୃହବନ୍ଦୀ ହେବାକୁ ଯାଉଛି, ପୁରୀର ଶ୍ରୀମନ୍ଦିରରେ କଟକଣା ଯୋଗୁଁ ଭକ୍ତଙ୍କର ଆଗମନ ପ୍ରାୟ ବନ୍ଦ ହୋଇଯାଇଛି । ଏହି ଖାଁ ଖାଁ ପରିସ୍ଥିତିରେ ଶ୍ରମିକ ତଥା ଦିନମଜୁରୀଆମାନଙ୍କର ସ୍ଥିତି ଖରାପ ହେବାରେ ଲାଗିଛି । ସବୁ କହିବା ପାଇଁ କହିଦିଅନ୍ତୁ, କିନ୍ତୁ ସାହାଯ୍ୟ କରିବାକୁ କେତେଜଣ ଆଗେଇ ଆସନ୍ତି ! 

ବାହାରେ ରହି କାମ କରୁଥିବା ଶ୍ରମିକମାନେ ଏବେ ଘରକୁ ବାହୁଡ଼ିବାରେ ଲାଗିଛନ୍ତି, କିନ୍ତୁ ଏ ଭଳି ସ୍ଥିତିରେ କ'ଣ ସେମାନେ କରୋନାଠାରୁ ସରୁକ୍ଷିତ? ସୁରକ୍ଷା ଦୃଷ୍ଟିରୁ ଏବେ କିନ୍ତୁ ରକ୍ତଦାନ ଶିବିରଗୁଡ଼ିକ ବନ୍ଦ କରିଦିଆଯାଇଛି ଏବଂ ରକ୍ତ ଭଣ୍ଡାରରେ ରକ୍ତର ଅଭାବ ମଧ୍ୟ ଦେଖାଗଲାଣି । ସୁରକ୍ଷା ଦୃଷ୍ଟିରୁ ବିଭିନ୍ନ ହୋଟେଲ୍ ଓ କ୍ୟାଣ୍ଟିନ୍‌କୁ ମଧ୍ୟ ବନ୍ଦ କରିଦିଆଗଲାଣି, ତେଣୁ ରୋଷଇ ଶିଖିନଥିବା ଲୋକମାନେ ଯେଉଁମାନେ ରୋଷେଇ ବିଷୟରେ ବଡ଼ ଜ୍ଞାନ ଦେଉଥିଲେ, ଏବେ ସେମାନଙ୍କ ମନରେ ଭାଳେଣି ପଡ଼ିବା ଆରମ୍ଭ କଲାଣି । ତେଣୁ ରାଜ୍ୟ ସରକାର ପାର୍କ ବନ୍ଦ କରିବା ଫଳରେ ଅନେକଙ୍କର ମନରେ ଚିନ୍ତା ବଢ଼ିବାରେ ଲାଗିଛି ଆଉ ଯେଉଁମାନେ କେବେ ପାର୍କର ମୁହଁ ଦେଖିନାହାନ୍ତି, ସେମାନେ ବି ସୋସିଆଲ ମିଡିଆରେ ଏହା ଉପରେ ଚର୍ଚ୍ଚା କରିବା ଆରମ୍ଭ କରିଦେଲେଣି ।

ବିଶ୍ୱ ସ୍ତରରେ କରୋନାର ମୃତ୍ୟୁଲୀଳା ଏବେ ସଭିଙ୍କୁ ଆତଙ୍କିତ କରି ରଖିଛି, ଯାହାର ଫଳ ସ୍ୱରୂପ ୧୧,୮୪୨ ଜଣଙ୍କର ମୃତ୍ୟୁ ହୋଇସାରିଲାଣି । ଭୟାବହତା ଏତେ ବଢ଼ିଲାଣି ଯେ ଅଧିକାଂଶ ଦେଶ ଏହାର ସୀମାଗୁଡ଼ିକୁ ବନ୍ଦ କରି ନିଜକୁ ଏକ ଘରିଆ କରିବାରେ ଲାଗିଗଲେଣି । ଏହା ଭିତରେ ରୋମ୍‌ରେ ରହିଯାଇଥିବା ଭାରତୀୟମାନଙ୍କୁ ଉଦ୍ଧାର କରିବା ପାଇଁ ଏୟାର ଇଣ୍ଡିଆର ବିମାନ ଯାତ୍ରା କରିବ । ଆଉ ବିଶ୍ୱର ସବୁଠାରୁ ସୁରକ୍ଷିତ ସ୍ଥାନ କୁହାଯାଉଥିବା ଆମେରିକା ରାଷ୍ଟ୍ରପତିଙ୍କ କାର୍ଯ୍ୟାଳୟ ତଥା ବାସଭବନ ହ୍ୱାଇଟ୍-ହାଉସ୍ କିନ୍ତୁ କରୋନା ଦାଉରୁ ସୁରକ୍ଷିତ ହୋଇପାରିନାହିଁ; ସେଠାରେ ଜଣେ କର୍ମଚାରୀଙ୍କ ଶରୀରରେ କରୋନା ଭୂତାଣୁ ମିଳିବାପରେ ଚିନ୍ତା ଆହୁରି ବଢ଼ିବାରେ ଲାଗିଛି ।

ଜନତା କର୍ଫ୍ୟୁକୁ ନେଇ ଆସନ୍ତାକାଲି ପାଇଁ ସମ୍ପୂର୍ଣ୍ଣ ଭାରତବର୍ଷ ଯୋଜନା କରିବାରେ ଲାଗିଛି । ୩,୭୦୦ ଟ୍ରେନ୍‌କୁ ବାତିଲ୍ କରିଦିଆଯାଇଛି । ଏହି ସମୟରେ କୌଣସି ବସ୍-ଅଟୋ-ଟ୍ୟାକ୍ସି ଆଦି ଗଡ଼ିବନି ବୋଲି ସମସ୍ତେ ଘୋଷଣା କରିଛନ୍ତି । ଭଦ୍ରକରେ ତ ଆଜିଠାରୁ ଦୋକନ ବଜାର ବନ୍ଦ ହେବାରେ ଲାଗିଗଲାଣି, ପୋଲିସ୍ ପ୍ରତ୍ୟେକ ଦୋକନ ବୁଲିବୁଲି ଲୋକମାନଙ୍କୁ ଏବଂ ବ୍ୟବସାୟୀମାନଙ୍କୁ ସତର୍କ କରାଇବାରେ ଲାଗିଛନ୍ତି ।

ଏହା ଭିତରେ କିନ୍ତୁ ଲୋକମାନେ ଗୁଜବ ପ୍ରଚାର କରିବାରେ ହେଳା କରିନାହାନ୍ତି, କେହି କେହି ତ ସୋସିଆଲ ମିଡିଆରେ କିଛି ପୁରୁଣା ଭିଡିଓ ପୋଷ୍ଟ କରିକି କହୁଛନ୍ତି କି, "ମୋଦି କରୋନା ପାଇଁ ଆଣ୍ଟିଡୋଡ୍ ଆକାଶରୁ ସ୍ପ୍ରେ କରିଛନ୍ତି, ତେଣୁ ଘରୁ ବାହାରିବ ନାହିଁ ।" କେହି କେହି ଏହାକୁ କେତେ କ'ଣ କହି ପ୍ରଚାର କରୁଛନ୍ତି । ଏହି ଭିତରେ ଜଣେ ଶିକ୍ଷକ କରୋନାରେ ଜଣଙ୍କର ମୃତ୍ୟୁ ହୋଇଥିବା ମିଥ୍ୟା ତଥ୍ୟ ସୋସିଆଲ୍ ମିଡିଆରେ ପ୍ରଚାର କରିବାରୁ ପୋଲିସ୍‌ଦ୍ୱାରା ଗିରଫ ମଧ୍ୟ ହୋଇଛନ୍ତି । ଏହା ଭିତରେ ବିଶେଷଜ୍ଞଙ୍କ ମତ ଯଦି ଦେଖିବା, କରୋନା ପୂର୍ବରୁ କିଛି ଲୋକଙ୍କର ଏହି ସୋସିଆଲ୍ ମିଡିଆ ଗୁଜବ ଯୋଗୁଁ ଭୟରେ ମୃତ୍ୟୁ ହୋଇପାରେ ।

ଏବେ ବି ଭାରତରେ ପରୀକ୍ଷା କେନ୍ଦ୍ରର ରହିଛି ଅଭାବ । ଯାହାହେଉ ବେସରକାରୀ ହସ୍ପାତାଳଗୁଡ଼ିକରେ ଏବେ ପରୀକ୍ଷା ହୋଇପାରିବ, କିନ୍ତୁ ସମଗ୍ର ଭାରତ ବର୍ଷରେ ମାତ୍ର ୧୧୧ଟି କେନ୍ଦ୍ରରେ ପରୀକ୍ଷା କରାଯିବ । ଯଦି ଆମେ ଭରତର ଲୋକ ସଂଖ୍ୟା ଦେଖିବେ, ତେବେ ଗୋଟିଏ କେନ୍ଦ୍ରରେ ୧କୋଟିରୁ ଅଧିକ ଲୋକ ପରୀକ୍ଷା କରେଇବେ । ତେବେ ଏହି ସମୟରେ ଅନ୍ୟ ଏକ ତଥ୍ୟ ଲୋକମାନଙ୍କ ମନରେ ଭୟକୁ ଆହୁରି ବଢ଼େଇବାରେ ଲାଗିଛି, ତାହା ହେଉଛି କି ୧୨ଜଣ କରୋନା ସଂକ୍ରମିତ ରୋଗୀ ରେଳଯାତ୍ରା କରିଥିଲେ ।

ଏହି ସମୟରେ ଯଦି ବିଶେଷଜ୍ଞଙ୍କ କଥା ଯଦି ଦେଖିବା, ତେବେ ଆଗାମୀ ଦୁଇ ସପ୍ତାହ ଭାରତ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ବୋଧେ ସେଇଥିପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ୧୪ ଘଣ୍ଟିଆ ଜନତା କର୍ଫ୍ୟୁକୁ ଆଉ ପାଦେ ଆଗକୁ ନେବାକୁ ଆମର ମୁଖ୍ୟମନ୍ତ୍ରୀ ଏହାକୁ ସାତ ଦିନପାଇଁ ବଢ଼େଇ ଦେଇଛନ୍ତି । ତଥାପି ଅତ୍ୟାବଶ୍ୟକୀୟ ଜିନିଷ, କ୍ଷୀର, ଫଳ ପରିବା ଦୋକାନ ଆଦି ଖୋଲା ରହିବ ।

Friday, 20 March 2020

କରୋନା କାହାଣୀ: ଭାରତରେ ଦ୍ରୁତଗତିରେ ବଢ଼ୁଛି ସଂକ୍ରମଣ

ସଂଗ୍ରାମ କେଶରୀ ସେନାପତି 10:00 pm 0
କରୋନା କାହାଣୀ: ଭାରତରେ ଦ୍ରୁତଗତିରେ ବଢ଼ୁଛି ସଂକ୍ରମଣ

କରୋନା ଭୂତାଣୁର ସଂକ୍ରମଣ ଏବେ ଭାରତରେ ଦିନକୁ ଦିନ ବଢ଼ିବାରେ ଲାଗିଛି । ଆକ୍ରାନ୍ତ ସଂଖ୍ୟା ୧୭୫ରୁ ୨୨୩ଯାଏଁ ପହଞ୍ଚିସାରିଲାଣି । ବିଶ୍ୱବ୍ୟାପୀ ୨୨୭,୭୬୪ ଜଣ ଭାଇରସ୍ ଆକ୍ରାନ୍ତ ହୋଇସାରିଥିବାବେଳେ ୯,୩୦୮ ଜଣଙ୍କ ମୃତ୍ୟୁ ହୋଇଗଲାଣି, ଯେଉଁଥିରେ ଚୀନ୍‌ର ମୃତ୍ୟୁସଂଖ୍ୟାକୁ ଇଟାଲୀ ଟପିଗଲାଣି । ଇଟାଲୀରେ ଅଳ୍ପଦିନ ମଧ୍ୟରେ ୩୪୦୫ଜଣଙ୍କ ମୃତ୍ୟୁ ହୋଇସାରିଥିବାବେଳେ ଚାଇନାରେ ୩୨୪୫ ଜଣ ପ୍ରାଣ ହରାଇଛନ୍ତି । ଇରାନ୍‌ରେ ପ୍ରତ୍ୟେକ ୧୦ ମିନିଟ୍‌ରେ ଜଣଙ୍କର କରୋନା ଭାଇରସ୍‌ରେ ମୃତ୍ୟୁ ହେଉଥିବାବେଳେ ୫୦ ଜଣ ଏହି ଭାଇରସ୍‌‌ରେ ଆକ୍ରାନ୍ତ ହେଉଛନ୍ତି ବୋଲି ସ୍ବାସ୍ଥ୍ୟ ମନ୍ତ୍ରାଳୟ ପକ୍ଷରୁ ସୂଚନା ଦିଆଯାଇଛି ।

ଭାରତରେ ମୃତ୍ୟୁସଂଖ୍ୟା ମଧ୍ୟ ୫ରେ ପହଞ୍ଚିଗଲାଣି । ରାଜସ୍ଥାନର ଜୟପୁରର ଫୋର୍ଟିସ ହସପିଟାଲରେ ଚିକିତ୍ସିତ ହେଉଥିବା ଜଣେ ୭୨ ବର୍ଷୀୟ ଇଟାଲୀ ନାଗରିକଙ୍କ ମୃତ୍ୟୁ ହୋଇଛି । ସେ ପୂର୍ବରୁ କରୋନା ସଂକ୍ରମିତ ହୋଇ ଆରୋଗ୍ୟ ଲାଭ କରିଥିଲେ ମଧ୍ୟ ପୁଣି ଥରେ ସେ ଅସୁସ୍ଥ ହୋଇ ମୃତ୍ୟୁବରଣ କରିଛନ୍ତି । ଯଦି ସେ କରୋନା ଭୂତାଣୁରେ ଦାଉରୁ ରକ୍ଷା ପାଇଥିଲା, ତେବେ ପୁଣି ମୃତ୍ୟୁବରଣ କେମିତି କଲେ? ସେ କ'ଣ ସତରେ ଆରୋଗ୍ୟ ହୋଇଥିଲେ, ନା ଏହା କୌଣସି ପ୍ରକାରର ଭୁଲ୍ ଥିଲା?

ଆଜି ଓଡ଼ିଶାରେ ମାଟ୍ରିକ୍ ପରୀକ୍ଷା ଖାତାଦେଖା ମଧ୍ୟ ବନ୍ଦ କରାଗଲା । ଯଦିଓ ସଂକ୍ରମଣ ରୋକିବା ପାଇଁ ବିଭିନ୍ନ ପ୍ରକାରର ପଦକ୍ଷେପ ସହ ଖାତା ଦେଖିବା ଆରମ୍ଭ ହୋଇଥିଲା, କିନ୍ତୁ ଭାରତ ବର୍ଷରେ ଆରମ୍ଭ ହୋଇଥିବା ଏହି ଦୃତ ସଂକ୍ରମଣ କିନ୍ତୁ ପରୀକ୍ଷା ଓ ମୂଲ୍ୟାୟନ ଉଭୟକୁ ଘୁଞ୍ଚାଇଦିଆଗଲା । ଅଧିକ ସଂକ୍ରମଣକୁ ରୋକିବାପାଇଁ ଯାତ୍ରାପାର୍ଟିଗୁଡ଼ିକୁ ମଧ୍ୟ ବନ୍ଦ କରିଦିଆଯାଇଛି । ଆଉ ଲୋକସେବା ଭବନର ସମସ୍ତ ଗ୍ରୁପ୍-ସି ଓ ଗ୍ରୁପ୍-ଡି କର୍ମକଚାରୀଙ୍କୁ ଆଗାମୀ ମାର୍ଚ୍ଚ ୩୦ ତାରିଖ ପର୍ଯ୍ୟନ୍ତ ଛୁଟି ଦେଇଦିଆଯାଇଛି ।

ଧୀରେ ଧୀରେ ଦୋକାନ ବଜାର ବନ୍ଦ ହେବାରେ ଲାଗିଛି, କିନ୍ତୁ ମଦ ଦୋକାନ ଏପର୍ଯ୍ୟନ୍ତ ଖୋଲା ରହିଛି; ଅବଶ୍ୟ ବାର୍ ଏବଂ ରେଷ୍ଟୁରାଣ୍ଟ ବନ୍ଦ କରିଦିଆଯାଇଛି । ତଥାପି ମଦ ଦୋକାନକୁ ଲୋକମାନେ ଧାଡ଼ିରେ ଯିବେ ଏବଂ ସେଠାରେ ଥିବା ସାନିଟାଇଜର୍ ବ୍ୟବହାର କରିବା ବାଧ୍ୟତାମୂଳକ କରାଯାଇଛି ।

ପଞ୍ଜାବରେ ମଧ୍ୟ ଆଜି ମଧ୍ୟରାତ୍ରରୁ ସମସ୍ତ ଯାତ୍ରୀ ପରିବହନ ବନ୍ଦ କରାଯାଉଛି । ମହାରାଷ୍ଟ୍ରର ୪ଟି ସହରକୁ ମଧ୍ୟ ସମ୍ପୂର୍ଣ୍ଣ ବନ୍ଦ କରିଦିଆଯାଇଛି । ଆଉ ବିଶ୍ୱ ସ୍ତରରେ ଏହି ଭୂତାଣୁକୁ ନେଇ ମଧ୍ୟ ଅନେକ ପ୍ରକାରର ଝଗଡ଼ା ଆରମ୍ଭ ହେବାକୁ ଲାଗିଛି । ଆମେରିକାର ରାଷ୍ଟ୍ରପତି ଡୋନାଲ୍‌ଡ୍ ଟ୍ରମ୍ପ୍ ଚୀନ୍ ଉପରେ ମଧ୍ୟ ତାଙ୍କର ରାଗ ଦେଖାଇଛନ୍ତି । ଚାଇନା ଏହି ଭୂତାଣୁ ସମ୍ପର୍କରେ ତଥ୍ୟ ଲୁଚାଇଥିବା କଥାକୁ ନେଇ ସେ କ୍ଷୋଭ ମଧ୍ୟ ପ୍ରକାଶ କରିଛନ୍ତି ।

ବିଶ୍ୱର ଅନ୍ୟତମ ବଡ଼ ଫିଲ୍ମ ଫେଷ୍ଟିଭାଲ୍ "କାନ୍"କୁ ମଧ୍ୟ ସ୍ଥଗିତ ରଖିଦିଆଯାଇଛି, ଯାହାକି ଏହି ଭୂତାଣୁର ଭୟାବହତାକୁ ନିଶ୍ଚିତରୂପେ ଦର୍ଶାଉଛି । ତେଣୁ ଭାରତରେ ଜନଗଣନା ମଧ୍ୟ ସ୍ଥଗିତ ହୋଇପାରେ, ଏହି ଉପରେ ଆଜି ପ୍ରଧାନମନ୍ତ୍ରୀଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଚିଠି ଲେଖିଛନ୍ତି । କରୋନା ସମ୍ପର୍କିତ ବୈଠକକୁ ଛାଡ଼ି ଆଉ କୌଣସି ପ୍ରକାରର ବୈଠକ ବସିପାରିବ ନାହିଁ ବୋଲି ମଧ୍ୟ ସରକାରୀ ସ୍ତରରେ ଘୋଷଣା ହେବାସହ କୌଣସି ସ୍ଥାନରେ ବି ୭ ଜଣରୁ ଅଧିକ ଏକାଠି ହୋଇପାରିବେ ନାହିଁ । ଏହା ନିଶ୍ଚିତ ରୂପରେ ଲୋକମାନଙ୍କ ଉପରେ କିଛିଟା ପ୍ରଭାବ ପକାଇବବ ବୋଲି ଆଶା ।

ଆସନ୍ତାକାଲିଠାରୁ ଭୁବନେଶ୍ୱରରେ ଅତ୍ୟାବଶ୍ୟକୀୟ ସାମଗ୍ରୀକୁ ଛାଡ଼ି ସମସ୍ତ ଦୋକାନ ବଜାର ବନ୍ଦ ରହିବ ଏବଂ ଯୁଗ୍ମ-ଅଯୁଗ୍ମ ସଂଖ୍ୟା ଅନୁସାରେ ଗାଡ଼ି ମଧ୍ୟ ଚାଲିବ, ଫଳରେ ଜନଗହଳି କିଞ୍ଚିତ୍ କମିବାର ଆଶା କରାଯାଉଛି । ଗତକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କର ତାଳି ଆଉ ଥାଳି ବଜାଇବା କଥାକୁ କିନ୍ତୁ ଲୋକେ ବିରୋଧ କରୁଛନ୍ତି, ବିରୋଧୀଦଳ ମଧ୍ୟ ବିରୋଧ କରୁଛନ୍ତି । ହେଲେ ବି ଓଡ଼ିଶାରୁ ଅନେକ ଲୋକ ଏହାକୁ ସମର୍ଥନ କରୁଛନ୍ତି ।

ଏହା ଭିତରେ ଆଜି ଏକ ବଡ଼ ଘଟଣା ମଧ୍ୟ ଘଟିଛି, ଯାହାକି ହୁଏତ ଏହି କରୋନାର ଭୟାବହତା ଭିତରେ ଚାପି ହୋଇଯାଇଛି । ୨୦୧୨ ମସିହାର ଦିଲ୍ଲୀ ଗଣ-ବଳାତ୍କାର ଘଟଣାର ଚାରି ଅଭିଯୁକ୍ତଙ୍କର ଅନେକ ଚାଲାକ ପଦକ୍ଷେପ ପରେ ଶେଷରେ ଆଜି ସକାଳେ ଫାଶୀ ପାଇଛନ୍ତି । ଦୀର୍ଘ ୭ ବର୍ଷର ଏହି ଲଢ଼େଇ ହୁଏତ ଆଜି ବିଶ୍ୱର ନହେଲା ନାହିଁ ଜାତୀୟ ମିଡିଆ ସବୁ ବଡ଼ ବଡ଼ ଗଣମାଧ୍ୟମରେ ଅତିକମରେ ୭ ଦିନ ଚାଲିଥାନ୍ତା । ହେଲେ ହୁଏତ ଏହା ମାତ୍ର ୭ ମିନିଟ୍‌ର ଖବର ହୋଇ ରହିଗଲା, କିନ୍ତୁ ଏକ ମାଆର ସେ ସଂଘର୍ଷମୟ ଯାତ୍ରା ଆଉ ଝିଅ ପାଇଁ ନ୍ୟାୟ ଭିକ୍ଷା ନିଶ୍ଚେ ଅନେକ ଲୋକଙ୍କ ମନରେ ଅନେକ ଦିନଯାଏଁ ରହିବ ।

Thursday, 19 March 2020

କରୋନା କାହାଣୀ: କ୍ବାରାଣ୍ଟିନ୍‌ରେ ୪୦ ହଜାର ଭାରତୀୟ

ସଂଗ୍ରାମ କେଶରୀ ସେନାପତି 11:00 pm 0
କରୋନା କାହାଣୀ: କ୍ବାରାଣ୍ଟିନ୍‌ରେ ୪୦ ହଜାର ଭାରତୀୟ

ସମଗ୍ର ବିଶ୍ୱରେ ରୋଗୀ ସଂଖ୍ୟା ବଢ଼ିବାରେ ଲାଗିଥିବାବେଳେ ଭାରତରେ ମଧ୍ୟ ରୋଗୀଙ୍କ ସଂଖ୍ୟା ବଢ଼ିବା ଆରମ୍ଭ କଲାଣି ଆଉ ମୃତ୍ୟୁ ସଂଖ୍ୟା ମଧ୍ୟ ଆଜି ୪ରେ ପହଞ୍ଚିଛି । ଜର୍ମାନୀରୁ ଆସିଥିବା ଜଣେ ୭୨ ବର୍ଷୀୟ ବୃଦ୍ଧ ଆଜି ପୁଣି କରୋନା ଆକ୍ରାନ୍ତରେ ମୃତ୍ୟବରଣ କରିଛନ୍ତି । ଆଉ ଏହି ପରିପ୍ରେକ୍ଷୀରେ ଯାହା ଅନୁମାନ କରାଯାଇଛି, ତାହା ଭୟକୁ ଅଧିକ ବଢ଼ାଇବାରେ ଲାଗିଛି । ଅନୁମାନ କରାଯାଇଥିବା ତଥ୍ୟ ଅନୁସାରେ ଆମେରିକାରେ ୨୨ ଲକ୍ଷ ଏବଂ ବ୍ରିଟେନ୍‌ରେ ୫ ଲକ୍ଷ ଲୋକଙ୍କ ଜୀବନ ଯାଇପାରେ । ଏବେ ଖାଲି ୨୨ରେ ନୁହେଁ, ଲକ୍ଷରେ ପହଞ୍ଚିଗଲାଣି; ଯାହାକି କେତେ ଭୟାବହ ହେବ ତାହା ଭାବିଲାବେଳକୁ ମଧ୍ୟ ହୃଦ୍‌ସ୍ପନ୍ଦନ ବଢ଼ିବାରେ ଲାଗିଛି ।

ଏ ସବୁ ଭିତରେ ଚୀନରୁ ଆରମ୍ଭ ହୋଇଥିବା ଏହି କରୋନା ଭୂତାଣୁ ଏବେ ଚୀନ୍ ଆଉ ଦକ୍ଷିଣ କୋରିଆରେ କମିବାରେ ଲାଗିଛି; ହୁଏତ ସେମାନଙ୍କର ଏହି କ୍ୟାରେଣ୍ଟାଇନ୍ ବ୍ୟବସ୍ଥା ଯୋଗୁଁ ଆମେ କିଛିଟା ସୁରକ୍ଷିତ ହେଇପାରିବା । ଏହି ରୋଗର ଭୟାବହତା ଖାଲି ମୋତେ ନୁହେଁ, ସମଗ୍ର ବିଶ୍ୱକୁ ଘାରିଛି, ସେଇଥିପାଇଁ ତ ୩୦ ଦିନ ଯାଏଁ ସବୁ ସୀମା ବନ୍ଦ କରିସାରିଲାଣି ଇଉରୋପ । ଏବେସୁଦ୍ଧା ୧୭୦ଟି ଦେଶକୁ ବ୍ୟାପିଗଲାଣି କରୋନା ଭୂତାଣୁ ।

ବିଦେଶରେ ଥିବା ୨୭୬ ଭାରତୀୟ ଆକ୍ରାନ୍ତ ହେଇସାରିଛନ୍ତି, ଯେଉଁଥିରୁ ଇରାନ୍‌ରେ ଅଛନ୍ତି ୨୫୫ ଆଉ ୟୁଏଇରେ ୧୨ । ସେନାବାହିନୀର ଜଣେ ଯବାନ ମଧ୍ୟ କରୋନାରେ ଆକ୍ରାନ୍ତ ହୋଇଛନ୍ତି, ତେଣୁ ତାଙ୍କର ସମସ୍ତ ସହକର୍ମୀ ଏବେ କ୍ବାରାଣ୍ଟିନ୍‌ରେ । ଏବେସୁଦ୍ଧା ଦେଶରେ ୧୭୦ରୁ ଅଧିକ ଆକ୍ରାନ୍ତ ହେବାସହ ପାଖାପାଖି ୪୦,୦୦୦ରୁ ଅଧିକ ଲୋକ କ୍ବାରାଣ୍ଟିନ୍‌ରେ ରହିଲେଣି ।

ଯୁଦ୍ଧାକାଳୀନ ଭିତ୍ତରେ ରାଜ୍ୟର ସବୁ ସରକାରୀ ଚିକିତ୍ସାଳୟରେ କରୋନା ୱାର୍ଡ ନିର୍ମାଣ ପାଇଁ ସରକାର ଯୋଜନା ଆରମ୍ଭ କରିଛନ୍ତି । ତେଣୁ ସବୁ ମନ୍ଦିର, ମସ୍‌ଜିଦ୍, ଗୀର୍ଜା ଆଦିରେ ପ୍ରବେଶ ନିଶେଦ୍ଧ କରାଗଲାଣି । କିନ୍ତୁ ଏତେ ସବୁ କଟକଣା ସତ୍ତ୍ୱେ ରାୟଗଡ଼ାରେ ଗୋଟିଏ ବିବାହ ଭୋଜିର ଆୟୋଜନ ହୋଇଥିଲା, ଯେଉଁଠି ଅଳ୍ପ ନୁହେଁ, ୪୦୦ରୁ ଅଧିକ ଲୋକଙ୍କ ପାଇଁ ଖାଦ୍ୟ ରୋଷେଇ ମଧ୍ୟ ସରିଥିଲା । ଅବଶ୍ୟ ଖାଦ୍ୟକୁ ନଷ୍ଟ ହେବାକୁ ନ ଦେଇ ଜିଲ୍ଲା ପ୍ରଶାସନ ଉଚିତ ସମୟରେ ପହଞ୍ଚି ଅଳ୍ପ ଅଳ୍ପ ଲୋକଙ୍କୁ ଭିତରକୁ ଛାଡ଼ିଥିଲେ ।

ତେଣେ ଆମର ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ତାଙ୍କ ଭଉଣୀ ଗୀତ ମେହେଟ୍ଟାଙ୍କ ନାମ ପଞ୍ଜୀକରଣ କରାଇବା ସହିତ ତାଙ୍କୁ କ୍ୱାରେଣ୍ଟାଇନ୍‌ରେ ରଖିଛନ୍ତି । ସବୁ ହସ୍ପାତାଳରେ କ୍ୱାରେଣ୍ଟାଇନ୍‌ ସୁବିଧା ନ ଥିବାରୁ ଏବେ ହୋଟେଲ୍‌ରେ ମଧ୍ୟ ବ୍ୟବସ୍ଥା କରିବା ନିଷ୍ପତ୍ତି ନିଆଯାଇଛି । ଯାହାହେଉ ଶେଷରେ ଓପିଏସ୍‌ସି ପକ୍ଷରୁ ଅନୁଷ୍ଠିତ ହେବାକୁ ଥିବା ସମସ୍ତ ଲିଖିତ ଓ ମୌଖିକ ପରୀକ୍ଷାକୁ ସ୍ଥଗିତ କରିଦିଆଯାଇଛି ।

ଏହି ସମୟରେ ସବୁଠାରୁ ଅଧିକ ଦାୟିତ୍ୱ ରହିଛି ଡାକ୍ତରମାନଙ୍କର । ସେମିତି ଜଣେ ଡାକ୍ତର ହେଲେ ଏଡିଏମ୍‌ଓ ଡ. ଅଶୋକ ଦାସ, ଯିଏକି ଘରେ ମା'ଙ୍କର ମରଶରୀରକୁ ଛାଡ଼ି ଡ୍ୟୁଟି କରିବାକୁ ଯାଇଥିଲେ । ଏହି ଭିତରେ ସମ୍ବଲପୁର ରେଳ ଷ୍ଟେସନ୍‌ରେ ଏକ ଆଶ୍ଚର୍ଯ୍ୟକର ଘଟଣା ଘଟିଛି । ଏକ ଟ୍ରେନ୍‌ରେ ଯାଉଥିବା ଜଣେ ବୃଦ୍ଧ ବ୍ୟକ୍ତି କାଶରେ ଖକାର ପଡ଼ିବାର, ତାଙ୍କୁ ରେଳରୁ ଓହ୍ଲାଇ ଦିଆଯାଇଥିଲା, କିନ୍ତୁ ତାଙ୍କୁ ହସ୍ପାତାଳକୁ ନେବାପାଇଁ ଆମ୍ବୁଲାନ୍ସର ସୁବିଧା କରାଇବାକୁ ଘଣ୍ଟାଏରୁ ଅଧିକ ସମୟ ଲାଗିଯାଇଥିଲା ।

ଏବେ ସମ୍ପୂର୍ଣ୍ଣ ବିଶ୍ୱ ଆତଙ୍କରେ ଥିବାବେଳେ ବିଭିନ୍ନ ଲୋକମାନଙ୍କଠାରୁ ସତର୍କତାମୂଳକ ବାର୍ତ୍ତା ଆସିବାରେ ଲାଗିଛି । ଲୋକମାନଙ୍କୁ ଆତଙ୍କିତ ନହେବାକୁ ସଭିଏଁ ପରାମର୍ଶ ଦେଉଛନ୍ତି, ଯେଉଁଥିରେ ଆଜି ଆମର ମହାମହିମ ରାଜ୍ୟପାଳ ପ୍ରଫେସର ଗଣେଶିଲାଲ୍ ତାଙ୍କର ମତାମତ ମଧ୍ୟ ରଖିଛନ୍ତି । ଏ ସବୁ ଭିତରେ ସରକାର ମଧ୍ୟ ଏକ ବଡ଼ ଘୋଷଣା କରିଛନ୍ତି; ସରକାରୀ କର୍ମଚାରୀଙ୍କୁ ଥଣ୍ଡା-ଜ୍ୱର ହୋଇଥିଲେ ମିଳିବ ୧୪ ଦିନର ଛୁଟି ।

ଏବେ ବି ଗାଁମାନଙ୍କରେ ବିଭିନ୍ନ ସତର୍କତାମୂଳକ ପଦକ୍ଷେପ ନ ନେଇ ଅନ୍ଧବିଶ୍ୱାସକୁ ଅଧିକ ଗ୍ରହଣ କରାଯାଉଛି । ଯାହାର ଫଳସ୍ୱରୂପ ବାଙ୍ଗାଲୋରରୁ ଆସିଥିବା ଏକ ପରିବାରକୁ ଗାଁ'ଲୋକେ ତାଙ୍କୁ ଗାଁ ଭିତରକୁ ପଶିବାକୁ ବାରଣ କରିଛନ୍ତି । ଖାଲି ଗାଁ ଲୋକେ କ'ଣ ରାଷ୍ଟ୍ରିୟ ସ୍ୱାସ୍ଥ୍ୟମନ୍ତ୍ରୀ ମଧ୍ୟ ଖରାରେ ୧୫ ମିନିଟ୍ ଲେଖାଏଁ ବସିବା ଭଳି ଅବାନ୍ତର ନିରାକରଣ ବ୍ୟବସ୍ଥା କଥା ଲୋକମାନଙ୍କୁ କହୁଛନ୍ତି । ଓଡ଼ିଶା ସରକାରଙ୍କ କରୋନା ନିବାରଣ କମିଟିର ମୁଖପାତ୍ର ସୁବ୍ରତ ବାଗ୍‌ଚୀ ଲୋକମାନଙ୍କୁ ସାଙ୍ଗରେ ନ ଗାଧୋଇବାକୁ, ପୋଖରୀରେ ନ ଗାଧୋଇବାକୁ ପରାମର୍ଶ ଦେଇଛନ୍ତି ।

ଏହି ସମୟରେ ଭଡ଼ାଟିଆମାନଙ୍କୁ ଘରୁ ବାହାର କରିପାରିବେନାହିଁ ବୋଲି ସରକାର ଘୋଷଣା କରିଛନ୍ତି ଆଉ ନିୟମ ମଧ୍ୟ କଡ଼ାକଡ଼ି ହେବାରେ ଲାଗିଛି । କେନ୍ଦ୍ର ସରକାରଙ୍କ ଅଧିନରେ କାର୍ଯ୍ୟ କରୁଥିବା ପାଖାପଖି ୫୦ ଶତକଡ଼ା କର୍ମଚାରୀଙ୍କୁ ଘରେ ରହି କାର୍ଯ୍ୟ କରିବାକୁ ନିର୍ଦ୍ଦେଶ ଦିଅଯାଇଛି । ତେଣେ ଜେଲ୍‌ର କଏଦୀମାନଙ୍କୁ ତାଙ୍କର ସମ୍ପର୍କୀୟମାନେ ଏବେ ମୁହାଁମୁହିଁ ନ ଭେଟି ସ୍କାଏପି ମାଧ୍ୟମରେ ଭେଟିବାର ବନ୍ଦୋବସ୍ତ କରାଯାଇଛି ଆଉ ସାରା ଓଡ଼ିଶାରେ କଏଦୀମାନଙ୍କୁ ଭେଟିବାକୁ ବାରଣ କରାଯାଇଛି ।

ଆମର ରାଜ୍ୟ ସରକାର ସମସ୍ତ ଶିକ୍ଷାନୁଷ୍ଠାନ ଓ କୋଚିଂ ସେଣ୍ଟର ଆଦିକୁ ବନ୍ଦ କରିବାକୁ ନିଷ୍ପତ୍ତି ନେଇଥିଲେ ମଧ୍ୟ ଏବେଯାଏଁ କେତେକ ସ୍ଥାନରେ କୋଚିଂ ଚାଲୁରହିଛି । ଅନିର୍ଦ୍ଧିଷ୍ଟ କାଳପାଇଁ ପରୀକ୍ଷା ବନ୍ଦ କରାଯାଇଥିବାବେଳେ ଏହି ସମୟରେ ୨/୩ ଘଣ୍ଟା ପଢ଼ି ପିଲାମାନେ କ'ଣ ଅଧିକ ଓପାଡ଼ି ପକେଇବେ ବୋଲି ଏ ଅଭିଭାବକ ଆଉ ଶିକ୍ଷକମାନେ ଭାବୁଛନ୍ତି, ତାହା ମୁଁ କାଇଁ ଜାଣିପାରୁନି । ଏକଦା ସ୍ୱଭାବ କବି ଗଙ୍ଗାଧର ମେହେର କହିଥିଲେ, "ମାତୃଭୂମି ମାତୃଭାଷାରେ ମମତା ଯା ହୃଦେ ଜନମୀ ନାହିଁ, ତାକୁ ଯେବେ ଜ୍ଞାନୀ ଗଣରେ ଗଣିବା ଅଜ୍ଞାନ ରହିବେ କାହିଁ ।" ଏବେ ସେମିତି ଏକ ପରିସ୍ଥିତି ଆସିଛି ଲାଗୁଛି । ଏ ଶିକ୍ଷକ, ଯିଏକି ପିଲାମାନଙ୍କୁ ଶିକ୍ଷାଦେବେ, ସେମାନେ ଏ ରୋଗର ଭୟାବହତା ବିଷୟରେ ଜାଣିପାରୁନାହାନ୍ତି, ତେବେ ସେମାନଙ୍କର ଏ ଶିକ୍ଷା ଆମର ଭବିଷ୍ୟତର ପିଲାମାନଙ୍କୁ କ'ଣ ସଚେତନ ନାଗରିକ କରି ଗଢ଼ି ତୋଳିବ? ସେଇଥିପାଇଁ ତ ଏବେ କୋଚିଂ ସେଣ୍ଟର ଉପରେ ଚଢ଼ାଉ କରି କେତେକଙ୍କୁ ଗିରଫ ମଧ୍ୟ କରାଯାଉଛି ।

ଆଉ ତ କେହି କେହି ଆକ୍ରାନ୍ତଙ୍କ ସଂଖ୍ୟା ଦେଖାଇ ଥଟ୍ଟା କରୁଥିବାବେଳେ କେହି କେହି ଏହାର ହସର ଉଡ଼େଇ ଦେଉଛନ୍ତି । କିନ୍ତୁ ଆଜିର ୨ୟ ଆକ୍ରାନ୍ତ ବିଷୟରେ ଜାଣିବାପରେ ହୁଏତ ସେମାନଙ୍କର ହସର ଯବନିକା ପଡ଼ିପାରେ । ପୂର୍ବରୁ କ୍ୟାପିଟାଲ ହସ୍ପିଟାଲରେ ଚିକିତ୍ସିତ ହେଉଥିବା ପ୍ରଥମ ଆକ୍ରାନ୍ତଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ଥିବାବେଳେ ୨ୟ ଆକ୍ରାନ୍ତ ଚିହ୍ନଟ କିନ୍ତୁ ମୋ ଭଳି ଅନେକଙ୍କ ଭିତରେ ଭୟ ସଞ୍ଚାର ତ ନିହାତି କରିଥିବ । ଯେତେ ଯାହା କଲେ ବି ମୋତେ ଟାଇଫଏଡ୍ ହେଇଥିବା ଜାଣିଲା ପରେ ବି, ନିୟମିତ ଔଷଧ ଖାଇଲାପରେ ବି ମନ କିନ୍ତୁ ସ୍ଥିର ହେଉନାହିଁ । ଏ ଭିତରର ଭୟ କାହା ଆଗରୁ ମଧ୍ୟ ପ୍ରକାଶ କରିହେଉନାହିଁ । ବାହାର ଦେଶରେ ଘଟୁଥିବା ତଥ୍ୟକୁ ଦେଖିବାପରେ କେମିତି ମନ ସ୍ଥିର ହେବ ଯେ... ଯେତେ କମେଡ଼ି ଦେଖିଲେ କି ଫିଲ୍ମ ଆଉ ସିରିଜ୍ ଦେଖିଲେ ବି ରାତିରେ ଶୋଇବା ପୂର୍ବରୁ ମନରେ ସେ ଦୃଶ୍ୟସବୁ ଆପେ ଆପେ ଆସିଯାଉଛି ।

ଆଜି ଆମର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶବାସୀଙ୍କୁ ପୁଣିଥରେ ରାତି ୮ଟାବେଳେ ଉଦ୍‌ବୋଧନ ଦେଇଥିଲେ । ୨୦୧୬ର ସେ ବିମୁଦ୍ରୀକରଣ ସମୟରେ ରାତି ୮ଟାବେଳେ ୫୦୦ ଆଉ ୧୦୦୦ ଟଙ୍କିଆ ନୋଟ୍ ବନ୍ଦ କରିବାର ନଷ୍ପତ୍ତି ଭଳି ଆଜି ସେ ୧୪ ଘଣ୍ଟା ଧରି ଦେଶ ବନ୍ଦ କରିବାକୁ ଆହ୍ୱାନ ଦେଇଛନ୍ତି । ଆସନ୍ତା ରବିବାର ଅର୍ଥାତ ମାର୍ଚ୍ଚ ୨୨ ତାରିଖରେ ସକାଳ ୭ଟାରୁ ରାତି ୯ଟା ପର୍ଯ୍ୟନ୍ତ ଘରେ ରଖି ଜନତା କର୍ଫ୍ୟୁ ପାଇଁ ମୋଦିଙ୍କର ଏକ ଅନୁରୋଧ ହୁଏତ କରୋନା ଭୂତାଣୁ ସଂକ୍ରମଣ ରୋକିବାରେ ସହୟକ ହେବ । ଅବଶ୍ୟ ଏହି ଖବରକୁ ନେଇ ଲୋକମାନେ କିଛି ନା କିଛି ମିଥ୍ୟା ଆରୋପ-ପ୍ରତ୍ୟାରୋପ କରିବେ ବୋଲି ମୋତେ କାଇଁ ଲାଗୁଛି ।

ଆଉ ଶେଷରେ ମୋଦି ଆଜ୍ଞା ଏକଥା ବି କହିଲେ କି ସେଦିନ ସନ୍ଧ୍ୟା ୫ଟାରେ ୫ ମିନିଟ୍ ପାଇଁ ଘରେ ଥାଇ, ଦୁଆର ମୁହଁରେ, ଝରକା ପାଖରେ କିମ୍ବା ବାଲ୍କୋନୀରେ ତାଳି କିମ୍ବା ଥାଳି ବଜାଇ ସେହି ଲୋକମାନଙ୍କୁ ଧନ୍ୟବାଦ ଜଣାଇବା, ଯେଉଁମାନେ ଏହି ପରିସ୍ଥିତିରେ ତାଙ୍କ ଜୀବନକୁ ବାଜି ଲଗାଇ ଆମ ପାଇଁ କାର୍ଯ୍ୟ କରୁଛନ୍ତି । ଏହା ଏକ ଭଲ ପଦକ୍ଷେପ ଅବଶ୍ୟ, କିନ୍ତୁ ସମଗ୍ର ଦେଶର ଲୋକ ଏକା ସମୟରେ ଏତେ ଶବ୍ଦ କରିବା ଦ୍ୱାରା ଧ୍ୱନି ପ୍ରଦୂଷଣ ହେବନି ତ? ଏ ଶବ୍ଦ ପଶୁପକ୍ଷୀମାନଙ୍କ ଉପରେ କିଛି କୁ-ପ୍ରଭାବ ପକାଇବନାହିଁ ତ? କିନ୍ତୁ ଯାହାହେଲେ ବି ଜଣେ ପ୍ରଧାନମନ୍ତ୍ରୀ ଏ ବିଷୟରେ କହିଛନ୍ତି ମାନେ ସେ ତ ପୂର୍ବରୁ ବିଶେଷଜ୍ଞମାନଙ୍କ ସହ ଆଲୋଚନା କରି ଏଭଳି ମନ୍ତବ୍ୟ ରଖିଥିବେ । ହୁଏତ ଏହି ସମୟରେ ଲୋକମାନଙ୍କର ମନରେ ଥିବା ଭୟକୁ ଦୂର କରିବା ପାଇଁ ଏହା ଏକ ପଦକ୍ଷେପ ହୋଇପାରିଥାଏ ।

Wednesday, 18 March 2020

କରୋନା କାହାଣୀ: ଆକ୍ରାନ୍ତଙ୍କ ସଂଖ୍ୟା ୨ଲକ୍ଷ ଛୁଇଁଲାଣି

ସଂଗ୍ରାମ କେଶରୀ ସେନାପତି 2:56 pm 0
କରୋନା କାହାଣୀ: ଆକ୍ରାନ୍ତଙ୍କ ସଂଖ୍ୟା ୨ଲକ୍ଷ ଛୁଇଁଲାଣି

ଧୀରେ ସ୍ଥିତି ଗମ୍ଭୀର ହେବାରେ ଲାଗିଛି । ଆଜି ସୁଦ୍ଧା ସାରା ବିଶ୍ୱରେ ଆକ୍ରାନ୍ତ ସଂଖ୍ୟା ୨ ଲକ୍ଷ ଛୁଇଁଲାଣି ଆଉ ଭାରତରେ ଆଜି ଆଉ ଜଣଙ୍କର ମୃତ୍ୟୁ ହେବା ସହ ଆକ୍ରାନ୍ତ ସଂଖ୍ୟା ୧୪୭ ହେଲାଣି । ଦୁବାଇରୁ ଫେରିଥିବା ଜଣେ ୬୪ ବର୍ଷୀୟ ମହିଳା ଆଜି ମୁମ୍ବାଇର କସ୍ତୁରବା ହସ୍ପିଟାଲରେ ଚିକିତ୍ସାଧୀନ ଥିବାବେଳେ ମୃତ୍ୟୁବରଣ କରିଛନ୍ତି । ତେଣୁ କାଲି ଆଲମ୍ପିକ୍ସ ନ ଘୁଞ୍ଜାଇବାକୁ ଦୃଢ଼ୋକ୍ତି ଦେଉଥିବା ଅଲମ୍ପିକ୍ସ ଆସୋସିଏସନ୍‌ର ସମିତି ଉପମୁଖ୍ୟ କରୋନାରେ ଆକ୍ରାନ୍ତ ହେଇଛନ୍ତି ।

ଆଜି ମୋର ମୁଣ୍ଡ ବିନ୍ଧା ନ କମିବାରୁ ମୁଁ ରକ୍ତ ପରୀକ୍ଷା ପାଇଁ ଯାଇଥିଲି, ଆଉ ଯାହା ବାହାରିଲା ତାହା ମୋତେ ମଧ୍ୟ ପ୍ରଥମେ ବିଶ୍ୱାସ ହେଲାନାହିଁ । ଥଣ୍ଡାଯୋଗୁଁ ଇସନଫିଲିଆ ବଢ଼ିଯାଇଥିବାବେଳେ ଜ୍ୱର ନଥାଇ ମଧ୍ୟ ଟାଇଫଏଡ୍ ବହୁତ ବଢ଼ିଯାଇଛି । ଏବେ ପୂର୍ବରୁ ଖାଉଥିବା ଔଷଧ ସହିତ ଏବେ ନୂଆ କିଛି ଯୋଡ଼ିବାକୁ ପଡ଼ିଲା । ପାଥୋଲୋଜିରେ ମଧ୍ୟ ରକ୍ତ ପରୀକ୍ଷା କରିବା ଆଗରୁ ପଚାରୁଛନ୍ତି, କରୋନାର ଭୟାବହତା ଉଣାଅଧିକେ ସଭିଙ୍କ ପାଖରେ ପହଞ୍ଛୁଛି । 

ତେଣେ ଭାରତରେ କରୋନା ପାଇଁ ପରୀକ୍ଷା କରିବାକୁ ଥିବା କିଟ୍‌ର ଅଭାବ ଦେଖାଯାଇଛି । ତେଣୁ ଭାରତ ସମୟ ବାହାର ଦେଶରୁ କିଛି ଆମଦାନୀ ପାଇଁ ଲାଗିପଡ଼ିଛନ୍ତି । ଦେଶର ବିଭନ୍ନ ସ୍ଥାନରେ ଏବେକାର ସ୍ଥିତିକୁ ଆଖି ଆଗରେ ରଖି ସବୁକିଛି ବନ୍ଦ କରାଯାଉଛି । ଭାରତ ନେଇଥିବା ପଦକ୍ଷେପ ପାଇଁ ବିଶ୍ୱ ସ୍ୱାସ୍ଥ୍ୟ ସଂଗଠନ ଭାରତକୁ ପ୍ରଶଂସା କରିଛି; କିନ୍ତୁ ଲୋକେ କେତେ ସଚେତନ ତାହା ଅନୁମାନ ହିଁ କରିହେଉନି । ମୋ ଭିତରେ ଯେମିତି ଭୟ ବଢ଼ିଚାଲଛି, ହୁଏତ ଲୋକାମାନଙ୍କ ମଧ୍ୟରେ ସେମିତି ଭୟ ଥାଇପାରେ, କିନ୍ତୁ ଅନ୍ୟ ଆଗରେ କେହି ପ୍ରକାଶ କରିପାରୁନାହାନ୍ତି । 

ଏହି ଭୂତାଣୁର ଭୟାବହତା ପାଇଁ ଦିନକୁ ୧୨ କୋଟିର ଡିଜେଲ ବିକ୍ରି କମିଥିବା ସୂଚନା ମିଳିଛି । ମାନ୍ଦାବସ୍ଥାକୁ ଦେଶ ଗତି କରୁଥିବା ଦର୍ଶେଇ ଅନେକ ଏବେବି ଅଫିସ୍ ଯିବାରେ ଲାଗିଛନ୍ତି । ପରୀକ୍ଷାର ଶେଷ ୫ ମିନିଟ୍‌ରେ କଲମର ବେଗ ବଢ଼ିଲା ଭଳିଆ ଏମାନେ ମଧ୍ୟ ସେମିତି କିଛି କରୁଛନ୍ତି । ଅନେକ ଶିକ୍ଷିତ ଲୋକମାନେ ମଧ୍ୟ ଏ ବିଷୟରେ ସମ୍ପୂର୍ଣ୍ଣ ସଚେତନ ହେବାକୁ ଚାହୁଁନାହାନ୍ତି ବୋଧେ ।

ସବୁ ପରେ ବି ବ୍ୟାଙ୍କ୍ ଆଉ ଏଟିଏମ୍‌ରେ ଟଙ୍କା ଦେଣ-ନେଣ ବନ୍ଦ କରିହେବନାହିଁ, ତେଣୁ ସେସବୁ ସ୍ଥାନରେ ସାନିଟାଇଜର୍, ସାବୁନ ଇତ୍ୟାଦି ରଖାଯିବା ସହ କରୋନା ସଚେତନତା ଉପରେ ପୋଷ୍ଟର୍‌ ଲଗାଯାଉଛି । ଏ ସବୁ ପରେ ବି ଏଯାଏଁ ମଦ ଦୋକାନ ଏବଂ ବାର୍ ସେମିତି ଖୋଲା ରହୁଛି; ଅବଶ୍ୟ ରାଜଧାନୀରେ ବାର୍‌ରେ ଏବେ ନୃତ୍ୟ କରିବା ବନ୍ଦ କରିଦିଆଯାଇଛି ।

ପୁରୀ ଶ୍ରୀମନ୍ଦିରରେ ମଧ୍ୟ ଶ୍ରଦ୍ଧାଳୁଙ୍କ ଆଗମନ କମିଛି, ସନ୍ଧାରେ ପହଡ଼ ପଡ଼ିଯାଉଛି ଆଉ ଅବଢ଼ାର ବିକ୍ରି ମଧ୍ୟ କମିଛି । ତଥାପି ଅଧିକ ସଚେତନତା ଆବଶ୍ୟକ ପଡ଼ୁଛି । ଏହି ସମୟରେ ବାରୁଣୀ ସ୍ନାନ ବନ୍ଦ କରିବା ଭଳି ମନ୍ଦିରରେ ମଧ୍ୟ ଦର୍ଶନ ବନ୍ଦ କରିଦେଲେ ହୁଅନ୍ତା । କିନ୍ତୁ ଏ ସବୁ ପରେ ବି ଏକ ଦୁଃଖଦ ବିଷୟ ହେଉଛି କି ମାଲେସିଆର ଏକ ଧାର୍ମିକ ସ୍ଥଳରେ ରୁଣ୍ଡ ହେଇଥିବା ଶ୍ରଦ୍ଧାଳୁମାନଙ୍କଠାରେ ଅଧିକମାତ୍ରାରେ କରୋନା ଭୂତାଣୁ ସଂକ୍ରମଣ ହୋଇଛି ।

ବିଦେଶରୁ ଫେରିଥିବା ଇଞ୍ଜିନିୟର୍‌ମାନଙ୍କୁ କମ୍ପାନୀ ନ ଯାଇ ଘରୁ ଥାଇ କାମ କରିବାକୁ କୁହାଯାଇଛି । ଏବେ ବି ସନ୍ଦିଗ୍ଧ ହସ୍ପାତାଳରୁ ଲୁଚି ପଳାଇବାରେ ଲାଗିଛନ୍ତି । ସେମିତି ଜଣେ ଯୁବକ ଲୁଚି ପଳାଇଥିଲେ, ଯାହାଙ୍କୁ ତାଙ୍କ ଶଶୁରଘରୁ ଉଦ୍ଧାର କରଯାଇଥିଲା । ଭାଗ୍ୟ ଭଲ କି ସେ ପିଲା ଆକ୍ରାନ୍ତ ହୋଇନାହିଁ ।

ସରକାରୀ ସ୍ତରରେ ଅନେକ ସତର୍କତାମୂଳକ ପଦକ୍ଷେପ ନିଆଯାଉଛି; ବାହାରେ ଛେପ ପକାଇବାକୁ ବାରମ୍ବାର ମନା କରିବା ସତ୍ତ୍ୱେ ଅନେକ ଲୋକ ଏବେ ବି ବାହାରେ ପାନ ଛେପ ପକାଉଛନ୍ତି । ରାସ୍ତାଘାଟରେ ଏବେ ବି ସେମିତି ଦୃଶ୍ୟ ଦେଖିବାକୁ ମିଳୁଛି । କରୋନା ଭୟରେ ଏବେ ଗାଡ଼ି ଚାଳନମାନେ ମଦ ପିଇଛନ୍ତି କି ନାହିଁ ପରୀକ୍ଷା ମଧ କରାଯାଉନାହିଁ । ଅନେକ ଲୋକ ସତର୍କ ଥିବା କଥା ଦେଖିବାକୁ ମଧ୍ୟ ମିଳୁଛି, ଫଳ ସ୍ୱରୂପ ୬ ଦିନରେ ୧ଲକ୍ଷରୁ ଅଧିକ ଲୋକ ଟିକେଟ୍ କ୍ୟାନ୍‌ସେଲ୍ କରିଲେଣି । ରେଳ ବିଭାଗର କିଛି ଟ୍ରେନ୍ ମଧ୍ୟ ବାତିଲ୍ ହେବାରେ ଲାଗିଛି । ଲୋକେ ନିଜ ନିଜର ଘରେ ସୁରକ୍ଷିତ ରହୁଛନ୍ତି ।

ଏ ସମୟରେ କିଛି ଦୁଃଖଦ ଘଟଣା ମଧ୍ୟ ସାମ୍ନାକୁ ଆସୁଛି । ମୃତ୍ୟୁର ଅନ୍ୟନାମ ଏବେ କରୋନା ସାଜିଥିବାବେଳେ ମୃତ୍ୟପରେ ବାପାର ଅନ୍ତିମ ଦର୍ଶନ କରି ମୁଖାଗ୍ନି ଦେବାକୁ ପୁଅ ମଧ୍ୟ ପହଞ୍ଚିପାରୁନାହିଁ । ବିଦେଶରୁ ଆସୁଥିବା ସମସ୍ତ ବିମାନସେବା ବନ୍ଦ ପରେ ବାପାଙ୍କର ଶେଷ ଦର୍ଶନ କରିପାରିଲାନି ପୁଅଟିଏ ।

ଏହିଭଳି ସ୍ଥିତିରେ ଓଡ଼ିଆ ମନୋରଞ୍ଜନ ଦୁନିଆରେ ପୁଣିଥରେ କିଛି ବିବାଦ ଦେଖାଦେଇଛି । କିଛି ବର୍ଷ ତଳେ ଏଞ୍ଜେଲ ପ୍ରିୟା ନାଁ'ରେ ଫେସ୍‌ବୁକ୍‌ର ଫେକ୍ ଆଇଡି ଚଲାଉଥିବା ଝିଅକୁ ସୁକୁଟି ସାହୁ ବୋଲି  କହ ଚର୍ଚ୍ଚାରେ ଥିବା ଓଡ଼ିଆ କଣ୍ଠଶିଳ୍ପୀ କିନ୍ତୁ ଏଥର ଝିଅକୁ କରୋନା ଭାଇରସ୍ ସହ ତୁଳନା କରିଛନ୍ତି । ଏବେ କିନ୍ତୁ ତାଙ୍କୁ ଅନେକ ସ୍ଥାନରେ ବିରୋଧ କରିଯାଇଛି ଆଉ କେତେକ ତାଙ୍କର ନାରୀଜାତି ପ୍ରତି ଏହି ଅପାମାନକୁ ନେଇ ଥାନାରେ ଏତଲା ଦେଇଛନ୍ତି । ଏହି ଭଳି ସମ୍ବେଦନପୂର୍ଣ୍ଣ ସମୟରେ ଏମିତି ଜିନିଷକୁ ନେଇ ବ୍ୟବସାୟ କରିବା ଆଦୌ ଗ୍ରହଣୀୟ ନୁହେଁ । ଏ ସବୁ ଭିତରେ ଓଡ଼ିଆ କଥାଚିତ୍ର ଏବଂ ଧାରାବାହିକର ସମସ୍ତ ସୁଟିଂ ବନ୍ଦ କରିଦିଆଯାଇଛି ।

କରୋନା ଭୂତାଣୁ ସଂକ୍ରମଣ ଆଶଙ୍କା ନେଇ ଚାରିଆଡ଼େ ଆତଙ୍କ ଖେଳିଚାଲିଛି, ତେଣୁ ଆଜିଠୁ କୋର୍ଟରେ କିଛି କାମ ନଥିଲେ ମଧ୍ୟ ଖାଲିରେ ଯାଇ ବସୁଥିବା ଓକିଲମାନେ ଏବେ ଆଉ କୋର୍ଟକୁ ନ ଯିବାକୁ ନିଷ୍ପତ୍ତ ନେଇଛନ୍ତି; କେବଳ କାମ ଥିବା ଓକିଲମାନେ ହିଁ ଯିବେ ଏବଂ ବାକିମାନେ ଘରେ ଥାଇ କାମ କରିବେ ବୋଲି ନିଷ୍ପତ୍ତି ନେଇଛନ୍ତି । ବିଦେଶରୁ ଫେରିବାପରେ ସ୍ବଇଚ୍ଛାରେ ୧୪ ଦିନିଆ ଆଇସୋଲେସନରେ ରହିଛନ୍ତି ଭାରତୀୟ ରାଜନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ସୁରେଶ ପ୍ରଭୁ । ଏମିତି ସଭିଏଁ କଲେ ଏହି ରୋଗ ବ୍ୟାପିବାରେ କିଛିଟା କମ୍ ହେଇପାରେ ବୋଲି ଆଶା କରାଯାଇଛି ।

ଏବେ ରାଜ୍ୟରେ ଅନେକ ସ୍ଥାନରେ ବିଭିନ୍ନ ପ୍ରକାରର କପଡ଼ାର ମାସ୍କ ମିଳୁଛି, ଯାହାକୁ ବ୍ୟବହାର କରିବା ଉଚିତ କି ନାହିଁ ଆମେ ଆଗରୁ ଲେଖି ବି ସାରିଛୁ । ଏବେ ମାସ୍କ ଆଉ ସାନିଟାଇଜର୍‌ର ଜରୁରୀ ଅଧିକ ପଡ଼ିବା ଫଳରେ ଦରକାର ଥିବା ଲୋକମାନଙ୍କୁ ମିଳୁନାହିଁ । ତେଣୁ ଜରୁରୀ ନ ଥିଲେ ମାସ୍କ ନ ପିନ୍ଧିବାକୁ ସୁବ୍ରତ ବାଗ୍‌ଚୀ ଅନୁରୋଧ କରିଛନ୍ତି । ତେଣୁ ଓଡ଼ିଶାରେ ନବୀନ ପଟ୍ଟନାୟକ ନେଉଥିବା ପଦକ୍ଷେପକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରଶଂସା କରିଛନ୍ତି ।

୧୯୯୯ ମହାବାତ୍ୟା ସମୟରେ ଓଡ଼ିଶାର ସେ ଦୃଶ୍ୟକୁ ଅନୁଭବ କରିବାପରେ ଏହି ରାଜ୍ୟକୁ ଗଢ଼ିଚାଲିଥିବା ଆମର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଫାଇଲିନ୍, ଫନି ଭଳି ବଡ଼ ବଡ଼ ବାତ୍ୟାକୁ ଦୃଢ଼ତାର ସହ ସାମ୍ନା କରିଥିଲେ । କିନ୍ତୁ ସେ ଏହି ରୋଗର ଭୟାବହତା ପାଇଁ ଏହାକୁ ଏହି ଶତାବ୍ଦୀର ବଡ଼ ଚ୍ୟାଲେଞ୍ଜ ବୋଲି କହିଛନ୍ତି । ଆଜିଠାରୁ ସିବିଏସ୍‌ଇ ପରୀକ୍ଷା ମଧ୍ୟ ମାର୍ଚ୍ଚ ୩୧ ଯାଏଁ ସ୍ଥଗିତ କରିଦିଆଯାଇଛି । କିନ୍ତୁ ଆଜି ଓଡ଼ିଶା ବୋର୍ଡ଼ର ମେଟ୍ରିକ୍ ଖାତାଦେଖା କାର୍ଯ୍ୟ ଆରମ୍ଭ ହୋଇଛି ।

ଏହି ଭିତରେ ଚୀନର ଅନେକ ଆକ୍ରାନ୍ତ ସୁସ୍ଥ ହେଉଥିବାବେଳେ ଇଟାଲୀରେ ସ୍ଥିତି ଖରାପ ହେବାପରେ ଲାଗିଛି । ତେଣେ ବ୍ଲଡ୍‌ଗ୍ରୁପ୍‌କୁ ନେଇ ମଧ୍ୟ କରୋନା ସଂକ୍ରମଣ ଉପରେ ଚର୍ଚ୍ଚା ଜୋର୍ ଧରିଛି । ହୁଏତ ଏହି ଚର୍ଚ୍ଚା କିଛି ଲୋକଙ୍କ ମନରେ ଅଧିକ ଭୟ ସୃଷ୍ଟି କରିପାରେ । ଅବଶ୍ୟ ମୋ ଭିତରର ଭୟ କିଛିଟା କମୁଥିବା ବେଳେ ତଥାପି ଆଉ କିଛି ଖବର ଏହାକୁ ବଢ଼ାଇବାରେ ଲାଗିଛି ।

Tuesday, 17 March 2020

କରୋନା କାହାଣୀ: କ୍ୱାରେଣ୍ଟାଇନ୍‌ରେ ପୁରୀ ଗଜପତି ମହାରାଜା ଦିବ୍ୟସିଂହ ଦେବ

ସଂଗ୍ରାମ କେଶରୀ ସେନାପତି 11:52 pm 0
କରୋନା କାହାଣୀ: କ୍ୱାରେଣ୍ଟାଇନ୍‌ରେ ପୁରୀ ଗଜପତି ମହାରାଜା ଦିବ୍ୟସିଂହ ଦେବ

କ୍ୱାରେଣ୍ଟାଇନ୍‌ରେ ପୁରୀ ଗଜପତି ମହାରାଜା ଦିବ୍ୟସିଂହ ଦେବଙ୍କ ପରିବାର; covid19.odisha.gov.in ପୋର୍ଟାଲ୍‌ରେ ରେଜିଷ୍ଟର କଲେ ମହାରାଜା ଏବଂ ଆଇଏଏସ୍ ଭିନିଲ କ୍ରିଷ୍ଣା । କରୋନା ଯୋଗୁଁ ଭାରତରେ ଗଲା ଆଉ ଜଣଙ୍କ ଜୀବନ; ଏବେ ୩ରେ ପହଞ୍ଚିଲା କରୋନା ମୃତକଙ୍କ ସଂଖ୍ୟା । ମହାରାଷ୍ଟ୍ରର ଜଣେ ୬୪ ବର୍ଷୀୟ ବ୍ୟକ୍ତିଙ୍କର କରୋନାରେ ମୃତ୍ୟୁ ହୋଇଛି । ଆମେରିକା ନୌସେନା‌ରେ ପ୍ରଥମ କରୋନା ଆକ୍ରାନ୍ତ ଚିହ୍ନଟ । ୨ ଆମେରିକୀୟ ଏମର୍ଜେନ୍ସି ଡାକ୍ତର ମଧ୍ୟ ଗୁରୁତର । ଫ୍ରାନ୍ସ ଆଉ ସ୍ପେନ୍‌‌ର ସ୍ଥିତି ମଧ୍ୟ ସାଂଘାତିକ; ୧୫୮ ରାଷ୍ଟ୍ରରେ କ‌ରୋନା, ମୃତ୍ୟୁସଂଖ୍ୟା ୬,୬୦୦ ଟପିଲା ।

କରୋନା ପ୍ରଭାବରେ ସେନ୍‌ସେକ୍‌ସ ପୁଣି ଖସିଲା ୨୭୧୩ ପଏଣ୍ଟ୍‌ । ଏଥର ଖାଲି ସ୍କୁଲ୍‌ର କ୍ଲାସ୍ ଛୁଟି ନୁହେଁ ପରୀକ୍ଷା ମଧ୍ୟ ବାତିଲ୍‌; ମାର୍ଚ୍ଚ ୩୧ ଯାଏଁ ଆସିବେନି ଶିକ୍ଷକ ଶିକ୍ଷୟିତ୍ରୀ । ଅନେକ ଜିଲ୍ଲାରେ ୧୪୪ ଧାରା ଜାରି ରହିଛି । ଆଉ ୩୨ ୟୁରୋପୀୟ ଦେଶ ଉପରେ କଟକଣା ଲଗାଇଲା ଭାରତ; ବସ୍‌ରେ ମଧ୍ୟ ଓଭର୍‌ଲୋଡିଂ ମନା; ବିଭନ୍ନ ସ୍ଥାନରେ ସାପ୍ତାହିକ ହାଟ ମଧ୍ୟ ବନ୍ଦ କରାଗଲା ।

ଏ ଭିତରେ ମୁଣ୍ଡ ବିନ୍ଧା କମିନାହିଁ । ତଥାପି ଭୟ ବଢ଼ିବାରେ ଲାଗିଛି । ଦୁଇଦିନର ଔଷଧ ଆଜି ଶେଷ ହେଇଯିବ; ଲାଗୁଛି କାଲି ସକାଳୁ ଯାଇକି ରକ୍ତ ପରୀକ୍ଷା କରିବାକୁ ହେବ । ଇସନ‌ଫିଲିଆ, ମ୍ୟାଲେରିଆ ସହ ଟାଇଫଏଡ୍ ଟେଷ୍ଟ କରିକି ପ୍ରଥମେ ଦେଖିବାକୁ ହେବ, ତା'ପରେ ଦେଖିବା ।

ଫେବୃଆରୀରୁ ମାର୍ଚ୍ଚ ୧୨ ମଧ୍ୟରେ ଓଡ଼ିଶା ଆସିଛନ୍ତି ୫୦୭୮ ପର୍ଯ୍ୟଟକ । କେତେ ଫେରିଛନ୍ତି, କେତେ ଅଛନ୍ତି? ତଥ୍ୟ ଖୋଜା ଚାଲିଛି । ଜନଗହଳି ପୂର୍ଣ୍ଣ ସ୍ଥାନରେ ମଧ୍ୟ କଟକଣା; କରୋନା ସତର୍କତାକୁ ଦୃଷ୍ଟିରେ ରଖି ୩୧ ଯାଏ ଭିତରକନିକା ବନ୍ଦ । କରୋନା ସନ୍ଦେହରେ ବିଦେଶୀ ନାଗରିକଙ୍କୁ ମଧ୍ୟ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଇଲା ପୁଲିସ ।

ଏ ସବୁ ପରେ ବି ବାର୍‌ରେ ଲାଗିନାହିଁ କରୋନା କଟକଣା; ଶହଶହ ଲୋକଙ୍କର ସମାଗମ ହେଉଥିବାରୁ ମହାମାରୀ ବ୍ୟାପିବା ଆଶଙ୍କା ବଢ଼ିବାରେ ଲାଗିଛି । ଆର୍‌ଟିଓ କାର୍ଯ୍ୟାଳୟରେ ଲମ୍ବା ଲାଇନ୍‌କୁ ମଧ୍ୟ କାହାର ଦୃଷ୍ଟି ନାହିଁ ବୋଲି ଅଭିଯୋଗ ପରେ ମାର୍ଚ୍ଚ ୩୧ ପର୍ଯ୍ୟନ୍ତ ଡ୍ରାଇଭିଂ ଓ ଲର୍ଣ୍ଣିଂ ଲାଇସେନସ ଟେଷ୍ଟ ଉପରେ ଲାଗିଲା ରୋକ ।

କରୋନା ମୁକାବିଲା ପାଇଁ ବିଧାନସଭା ପରିସରକୁ ସଭିଙ୍କ ପ୍ରବେଶ ମନା, କେବଳ କର୍ମଚାରୀ, ମନ୍ତ୍ରୀ ଓ ବିଧାୟକ ଯାଇପାରିବେ । ସବୁ ସରକାରୀ କାର୍ଯ୍ୟାଳୟ ସମ୍ମୁଖରେ ଏବେ ଥର୍ମାଲ ସ୍କାନିଂ ଲାଗିବା ସହ ସାଇଟାନିଟାଇଜର ମଧ୍ୟ ଉପଲବ୍ଧ ହେବ ବୋଲି ସୂଚନା ଦେଲେ ରାଜ୍ୟ ସରକାର; କିନ୍ତୁ ଥଣ୍ଡା, କାଶ, ସର୍ଦ୍ଦିି ବା ଛିଙ୍କରେ ପୀଡ଼ିତ ଥିବା କର୍ମଚାରୀମାନଙ୍କୁ କାର୍ଯ୍ୟାଳୟ ମଧ୍ୟକୁ ପ୍ରବେଶ କରିବାକୁ ଦିଆଯିବ ନାହିଁ ।

ସରକାରଙ୍କ ତରଫରୁ ଆରମ୍ଭ କରାଯାଇଥିବା COVID-19 ପଞ୍ଜୀକରଣର ପ୍ରଥମ ଦିନରେ ୧୨୩୯ ବିଦେଶ ଫେରନ୍ତା ପଞ୍ଜୀକରଣ କରିଥିବା ସୂଚନା ଦେଇଛନ୍ତି ମୁଖପାତ୍ର ସୁବ୍ରତ ବାଗ୍‌ଚୀ । କ୍ୟାପିଟାଲ ହସ୍ପିଟାଲରେ ଚିକିତ୍ସାଧୀନ ଥିବା ଓଡ଼ିଶାର ପ୍ରଥମ ଆକ୍ରାନ୍ତଙ୍କ ସ୍ୱାସ୍ଥ୍ୟାବସ୍ଥା ମଧ୍ୟ ଭଲ ଅଛି ।

ଏବେ ବି ଲୋକମାନେ ମଧ୍ୟ ଅଯଥାରେ ବିଭିନ୍ନ ସ୍ଥାନରେ ଗହଳି କରୁଛନ୍ତି, ଭୟାବହତାକୁ ବୁଝିବାକୁ ଚେଷ୍ଟା ମଧ୍ୟ କରୁନାହାନ୍ତି । ରେଳ ଷ୍ଟେସନରେ ଭିଡ଼ କମାଇବାକୁ ପ୍ଲାଟଫର୍ମ ଟିକେଟ ମୂଲ୍ୟ ୫୦ଟଙ୍କାକୁ ବୃଦ୍ଧି କରିଛି ଭାରତୀୟ ରେଳ ବିଭାଗ । ପୂର୍ବତଟ ରେଳର ୧ଲକ୍ଷରୁ ଅଧିକ ଟିକେଟ ବାତିଲ୍; ୫ ଯୋଡ଼ା ସ୍ୱତନ୍ତ୍ର ଟ୍ରେନ୍‌ ଚଳାଚଳ ମଧ୍ୟ ବାତିଲ ହୋଇଯାଇଛି ।

ଭାରତରେ କରୋନାର ପ୍ରଭାବ ଷ୍ଟେଜ୍‌-୨ରେ ସୀମିତ ଥିବା ବିଶ୍ୱାସ କରାଯାଉଛି ଆଉ ଏ ପର୍ଯ୍ୟନ୍ତ ଆକ୍ରାନ୍ତଙ୍କ ସଂଖ୍ୟା ୧୩୭କୁ ବୃଦ୍ଧି ପାଇଛି । ତଥାପି ଗୁଜବ ବଢ଼ିବାରେ ଲାଗିଛି; ଏଥର ତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନାଁରେ କରୋନା ନେଇ ଅପପ୍ରଚାର କରିଯାଇଥିଲା । ଅବଶ୍ୟ ପରେ କେନ୍ଦ୍ରାପଡ଼ାରୁ ଚାରି ଜଣଙ୍କୁ ପୋଲିସ୍ ଗିରଫ କରିଛି ।

ବିଶ୍ୱ ସ୍ତରରେ ବିଭିନ୍ନ କାର୍ଯ୍ୟକ୍ରମ ବନ୍ଦ ହେବାରେ ଲାଗିଛି । ବର୍ଲିନ୍‌ରେ ହେବାକୁ ହେବାକୁ ଉଇକିମିଡିଆ ସମିଟ୍ ମଧ୍ୟ ବନ୍ଦ ହେଇଯାଇଛି । ଉଇକିମାନିଆ ବନ୍ଦ ହେବାର ସୂଚନା ମଧ୍ୟ ମିଳୁଛି; କିନ୍ତୁ ଅଲିମ୍ପିକ୍ସ ନିର୍ଦ୍ଧାରିତ ସମୟରେ ହେବ ବୋଲି ଅନ୍ତର୍ଜାତୀୟ ଅଲିମ୍ପିକ କମିଟି ସୂଚନା ଦେଇଛନ୍ତି । ବିଶ୍ୱାସ କରିବାକୁ ଏବେ ମଧ୍ୟ ଟିକେ ସମୟ ଲାଗିବ, ହେଇପାରେ ଏହି ଭିତରେ କିଛି କଥା ମଧ୍ୟ ବଦଳିପାରେ ।

Monday, 16 March 2020

କରୋନା କାହାଣୀ: ଓଡ଼ିଶାରେ ପ୍ରଥମ ଆକ୍ରାନ୍ତ ଚିହ୍ନଟ

ସଂଗ୍ରାମ କେଶରୀ ସେନାପତି 11:14 pm 0
କରୋନା କାହାଣୀ: ଓଡ଼ିଶାରେ ପ୍ରଥମ ଆକ୍ରାନ୍ତ ଚିହ୍ନଟ

ଓଡ଼ିଶାର ପ୍ରଥମେ କରୋନା ଭୂତାଣୁ ଆକ୍ରାନ୍ତ ଚିହ୍ନଟ ହୋଇଛି । ଆଜି ସୁଦ୍ଧା ୧୫୬ଟି ଦେଶରେ ୬ ହଜାରରୁ ଅଧିକ ମୃତ୍ୟୁବରଣ କଲେଣି ଆଉ ଇଉରୋପ୍‌ରେ ସ୍ଥିତି ଖରାପ ହେବାରେ ଲାଗିଛି । ସାରା ବିଶ୍ୱରେ ଆତଙ୍କ ସୃଷ୍ଟି କରି ବିଶ୍ୱ ସମୁଦାୟକୁ ଭୟଭୀତ କରାଇପାରିବ ବୋଲି ଦାବି କରୁଥିବା ଆଇଏସ୍‌ ଆତଙ୍କବାଦୀଙ୍କୁ ମଧ୍ୟ କରୋନା ଭୟ ଘାରିଛି । ୭୦୦ ଜାହାଜକୁ ସମୁଦ୍ର ପଥରେ ଭାରତ ମଧ୍ୟକୁ ପ୍ରବେଶ ଅନୁମତି ଦେଲାନି ଭାରତ । ଓଡ଼ିଶାର ବିଭିନ୍ନ ମନ୍ଦିରରେ ଦର୍ଶନ ସମୟରେ ଅନେକ ସତର୍କ ପନ୍ଥା ଗ୍ରହଣ କରାଯାଉଛି । କିଛି ଲୋକ ସଚେତନ ହେଉଥିବା ବେଳେ କିଛି ମୂର୍ଖ ଏହାକୁ ହସରେ ଉଡ଼ାଉଛନ୍ତି । ଏତେ ସବୁ ପରେ ବି ସନ୍ଦିଗ୍ଧ ଚମ୍ପଟ ମାରୁଛନ୍ତି ।

ମୋର ମୁଣ୍ଡ ବିନ୍ଧା କମୁନାହିଁ । ଆଜି ଓଡ଼ିଶାରୁ ଆକ୍ରାନ୍ତ ବିଷୟରେ ଜାଣିବା ପରେ ଭୟ ଏବେ ଆହୁରି ଭିତରେ ବଢ଼ିବାକୁ ଲାଗିଛି । ଥଣ୍ଡା ଯଦିଓ ଆଗରୁ ଛାଡ଼ିନଥିଲା, ତେଣୁ ଆଜି ପୁଣିଥରେ ଘନ ମଉସାଙ୍କୁ ଫୋନ୍ କରିକି ମେଡିସିନ୍ ଆଣିଲି ଆଉ ମେଡିସିନ୍ ଖାଇ କାଲି ପର୍ଯ୍ୟନ୍ତ ଅପେକ୍ଷା କରିବାକୁ ହେବ ।

ଲାଗୁଛି ୨୦୧୩/୧୪ର ସେ ପୁରୁଣା ଦିନ ଏବେ ପୁଣି ଫେରି ଆସିଛି । ଭିତରରେ ଥିବା ଭୟ ଉପରକୁ ଆସିପାରୁନି, କିନ୍ତୁ ଭିତରେ ବି ରହିପାରୁନି । ଏମିତିରେ ୟୁ-ଟ୍ୟୁବ୍‌ରେ ଥିବା ସବୁ ସିରିଜ୍ ଶେଷ ହେଇଗଲାଣି ମୋ ପାଇଁ, ସେଇଥିପାଇଁ ଆଜି Netflixର Subscription ନେଇଗଲି । କିଛି ନହେଲେ Little Thingsର ୨ୟ ଆଉ ୩ୟ Season ଦେଖିପାରିବି । କିଛି ନହେଲେ କିଛି ଫିଲ୍ମ ବି ଦେଖିପାରିବି । ସେବେକାର ଭୟକୁ ଏଡ଼େଇବା ପାଇଁ ମନକୁ ଅନ୍ୟଆଡ଼େ ରଖିବା ଜରୁରୀ ଥିଲା ଆଉ ଏବେ ମଧ୍ୟ । ହୁଏତ ଏ ସବୁ ପରେ କିଛିଟା ବଦଳିପାରେ ।

ଓଡ଼ିଶାର ପ୍ରଥମ ଭୂତାଣୁ ଆକ୍ରାନ୍ତ ଜଣଙ୍କ କ୍ୟାପିଟାଲ ହସ୍ପିଟାଲରେ ଚିକିତ୍ସିତ ହେଉଛନ୍ତି । ସେ ଇଟାଲୀରୁ ଫେରିବା ପରେ ଦିଲ୍ଲୀରେ ତାଙ୍କର ସ୍ୱାସ୍ଥ୍ୟ ପରୀକ୍ଷାପରେ କିଛି ବାହାରିନଥିଲା ଆଉ ସେ କିଛିଦିନ କ୍ବାରେଣ୍ଟିନ୍‌ରେ ରହିବାପରେ ୧୨ ତାରିଖରେ ଟ୍ରେନ୍ ଯୋଗେ ଓଡ଼ିଶା ଫେରିଥିଲେ । ଆଶ୍ଚର୍ଯ୍ୟର କଥା ଏହି କି, କାଲି ଅର୍ଥାତ ୧୫ ତାରିଖ ରାତି ୯ଟାରେ ତାଙ୍କ ରିପୋର୍ଟ ନେଗେଟିଭ୍ ବାହାରିଥିବାବେଳେ ରାତି ୧୨ଟରେ ପଜିଟିଭ୍ ବାହାରିଥିଲା ।

ଏବେ ବି ବିଭିନ୍ନ ସମୟରେ ବିଭିନ୍ନ ଲୋକମାନଙ୍କ ଦ୍ୱାରା WhatsApp ଦ୍ୱାରା ବିଭିନ୍ନ ତଥ୍ୟ ଆସୁଛି । ଅନେକ ୨୦୧୧ ମସିହାରେ ମୁକ୍ତିଲାଭ କରିଥିବା ଇଂରାଜୀ ଭାଷାର ଚଳଚ୍ଚିତ୍ର କୋଣ୍ଟାଜିଅନ୍ (Contagion) ସହ ଏବେକାର ପରିସ୍ଥିତିକୁ ତୁଳନା କରିବାରେ ଲାଗିଛନ୍ତି । ସରକାରଙ୍କ ତରଫରୁ ବିଭିନ୍ନ ପ୍ରକାରର ସଚେତନତାମୂଳକ ଭିଡିଓ ସହ ବିଭିନ୍ନ ପ୍ରକାରର ପୋଷ୍ଟ ଆସୁଛି । ଓଡ଼ିଶାର କରୋନା ଭାଇରସ୍ ଉପରେ ନିୟନ୍ତ୍ରଣାତ୍ମକ ଅଦକ୍ଷ ସୁବ୍ରତ ବାଗ୍‌ଚୀ ପ୍ରତ୍ୟେକଦିନ ପ୍ରେସ୍‌ମିଟ୍ କରୁଛନ୍ତି ଆଉ ସବୁକିଛି ପ୍ରାଞ୍ଜଳ ଭାବରେ ବୁଝାଇବା ସହ ବିଭିନ୍ନ ପଦକ୍ଷେପ ବିଷୟରେ କହୁଛନ୍ତି । ହେଲେ ସେଠାରେ ଉପସ୍ଥିତ ଥିବା ଜଣେ ସାମ୍ବାଦିକ ବନ୍ଧୁ ଏହି ଜରୁରୀକାଳୀନ ପରିସ୍ଥିତିକୁ ନେଇ କରିଥିବା ପ୍ରଶ୍ନ ନିହାତି ହାସ୍ୟସ୍ପଦ ଥିଲା । ତଥାପି, ଆମକୁ ସତର୍କ ରହିବାକୁ ହେବ ଆଉ ହଁ ଡରିଲେ ଅସୁବିଧା ।

କିନ୍ତୁ ଏହି କଥା ଅନ୍ୟକୁ କହିବା ସହଜ ଆଉ ନିଜ ଉପରେ ପଡ଼ିଲେ, କ'ଣ ହୁଏ, ତାହା ମୁଁ କିନ୍ତୁ ଅନୁଭବ କରିପାରୁଛି । ଯଦିଓ ଏହି ବିଷୟରେ କାହାକୁ କିଛି କହିପାରୁନି । ଚୁପ୍‌ଚାପ୍ ଏହି ବ୍ଲଗ୍‌ରେ ସେ ବିଷୟରେ କିଛି କିଛି ଲେଖୁଛି ଖାଲି ।

ଆଜି ରାଜସ୍ଥାନର ଜୟପୁରର ତିନିଜଣ କରୋନା ଆକ୍ରାନ୍ତ ରୋଗୀଙ୍କୁ ଡାକ୍ତର ଠିକ୍ କରିଛନ୍ତି; ମ୍ୟାଲେରିଆ, ସ୍ୱାଇନ୍‌ ଫ୍ଲୁ ଏବଂ ଏଚ୍‌ଆଇଭି ପଜିଟିଭ୍‌ ରୋଗୀମାନଙ୍କୁ ଦିଆଯାଉଥିବା ଔଷଧର ମିଳିତ ଅନୁପାନ ଦେଇ ସେମାନେ ଏହି ତିନିଜଣ କରୋନାଭାଇରସ୍‌ ଆକ୍ରାନ୍ତ ରୋଗୀଙ୍କୁ ସୁସ୍ଥ କରିଛନ୍ତି ବୋଲି ସୂଚନା ଦେଇଛନ୍ତି । ମାତ୍ର ଏସବୁ କ'ଣ ସତରେ ହେଇଛି, ମୋତେ ଅବଶ୍ୟ ଏ ଉପରେ ଏବେ ବି ବିଶ୍ୱାସ ହେଉନି ।

ଆମେରିକା କରୋନା ଭୂତାଣୁର ପ୍ରତିଷେଧକ ପ୍ରସ୍ତୁତ କରିଥିବା କଥା ଦାବି କରୁଥିବାବେଳେ ଆଜିଠାରୁ ପରୀକ୍ଷଣ ଆରମ୍ଭ କରିଥିବା ଜଣେଇଛି ଆଉ ଆମେରିକାର ରାଷ୍ଟ୍ରପତି ଡୋନାଲଡ୍ ଟ୍ରମ୍ପ ଏକ ଜର୍ମାନୀ କମ୍ପାନୀର ଏହି ପ୍ରତିଷେଧକକୁ କିଣିବାକୁ ଉଦ୍ୟମ କରୁଥିବା କଥା ଜର୍ମାନ ଅଭିଯୋଗ କରିଛି । କିନ୍ତୁ ବିଶ୍ୱ ସ୍ତରରେ ସୃଷ୍ଟି ହେଇଥିବା ଏହି ଜରୁରୀକାଳିନ ପରିସ୍ଥିତିରେ ଏମିତି ଆରୋପ-ପ୍ରତ୍ୟାରୋପ ହାସ୍ୟାସ୍ପଦ ନିହାତି ।

କରୋନା ଆକ୍ରାନ୍ତ ସନ୍ଦିଗ୍ଧଙ୍କ ନାମ ଓ ପରିଚୟ ଗୋପନ ରଖିବାକୁ ପରାମର୍ଶ ଦେଲେ ରାଜ୍ୟ ସରକାରଙ୍କ ମୁଖ୍ୟ ମୁଖପାତ୍ର ସୁବ୍ରତ ବାଗ୍‌ଚୀ ମହୋଦୟ, ଯାହାକି ଏକ ଭଲ ନିଷ୍ପତ୍ତି ନିଶ୍ଚୟ । କରୋନା ମୁକାବିଲା ପାଇଁ ମାର୍ଚ୍ଚ ୨୧ରେ ହେବାକୁ ଥିବା ମହାବାରୁଣୀ ସ୍ନାନକୁ ବନ୍ଦ କରିଲା ଯାଜପୁର ଜିଲ୍ଲା ପ୍ରଶାସନ । ଅଧିକ ଲୋକଙ୍କର ସମାଗମ ସ୍ଥାନକୁ ବନ୍ଦ କରିବା ନିହାତି ଦରକାର ବୋଲି ଲାଗୁଛି । ସତର୍କତା ଅବଲମ୍ବନ ସ୍ୱରୂପ ଉତ୍କଳ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ହଷ୍ଟେଲ୍ ବନ୍ଦ କରିଦେଲେ ଆଉ ୨୪ ଘଣ୍ଟା ମଧ୍ୟରେ ହଷ୍ଟେଲ୍ ଛାଡ଼ିବାକୁ ପିଲାଙ୍କୁ ନିର୍ଦ୍ଦେଶ ଦେଇଛନ୍ତି ।

ଏହାସହ ରାଜ୍ୟ ନିର୍ବାଚନ ଆୟୋଗ କରୋନା ପାଇଁ ପଞ୍ଚାୟତ ଉପନିର୍ବାଚନ ମଧ୍ୟ ସ୍ଥଗିତ କରିଛନ୍ତି । କରୋନା ମୁକାବିଲା ପାଇଁ ବିଦେଶରୁ ଆସିଥିବା ବ୍ୟକ୍ତିଙ୍କ ପଞ୍ଜୀକରଣ ବାଧ୍ୟତାମୂଳକ କଲେ ରାଜ୍ୟ ସରକାର, ଉଲ୍ଲଂଘନ କଲେ ଦଣ୍ଡସ୍ୱରୂପ ଫୌଜଦାରୀ ମାମଲା ମଧ୍ୟ ରୁଜ୍ଜୁ ହେଇପାରେ ବୋଲି ଜଣେଇଲେ କର୍ତ୍ତୃପକ୍ଷ । ମାର୍ଚ୍ଚ ୪ ପରେ ରାଜ୍ୟକୁ ବାହାର ଦେଶରୁ ଆସିଥିବା ସମସ୍ତ ନାଗରିକ ପଞ୍ଜୀକରଣ କରିବା ବାଧ୍ୟତାମୂଳକ କରାଗଲା । ବିଦେଶରୁ ଆସି ପଞ୍ଜୀକରଣ କରି ଘରେ ଆଇସୋଲେସନ୍‌ରେ ରହିଲେ ପ୍ରୋତ୍ସାହନ ସ୍ୱରୂପ ସରକାର ୧୫ ହଜାର ଟଙ୍କା ଯୋଗେଇ ଦେବାକୁ ପ୍ରତିଶୃତି ମଧ୍ୟ ଦେଲେ ।

ସରକାରଙ୍କ ନୂଆ କଟକଣା ଅନୁସାରେ ୟୁରୋପ, ବ୍ରିଟେନ, ତୁର୍କୀରୁ ଭାରତ ଆସିବା ମନା କରିଦିଆଗଲା । ଅନେକ ସ୍ଥାନରେ ହୋଟେଲ୍ ବୁକିଂ, ଫ୍ଲାଇଟ୍/ଟ୍ରେନ୍ ଟିକେଟ ବୁକିଂ ଆଦି ରଦ୍ଧ କରାଯାଉଛି ।

ଏହା ଭିତରେ କିଛି ଲୋକ ମଧ୍ୟ ଅନ୍ଧବିଶ୍ୱାସକୁ ଆହୁରି ଆପଣେଇ ନେଉଛନ୍ତି । ମାଲକାନଗିରି ସଦର ମହକୁମାସ୍ଥିତ ଏମଭି-୨ ଗ୍ରାମର ଗ୍ରାମବାସୀ ଗ୍ରାମଦେବୀଙ୍କ ନିକଟରେ ପୂଜାର୍ଚ୍ଚନା କରିଛନ୍ତି । ଆଶ୍ଚର୍ଯ୍ୟର କଥା ହେଉଛି ସରକାର ଜନଗହଳିରୁ ଦୂରେଇ ରହିବାକୁ ନିର୍ଦ୍ଦେଶ ଦେଉଥିବାବେଳେ ସେମାନେ ଏକତ୍ରିତ ହେଲେ ଆଉ ଏହି ଘଟଣାକୁ କିଛି ବୁଦ୍ଧିଜୀବି ମଧ୍ୟ ପ୍ରଶଂସା କରୁଛନ୍ତି । ଅବଶ୍ୟ ସେମାନେ ସଚେତନ ରହିବା ଦରକାର, କିନ୍ତୁ ଏଭଳି ନୁହେଁ । ଏହା ଭୟଭୀତ ହେବାର ଲକ୍ଷଣ ।

Sunday, 15 March 2020

କରୋନା କାହାଣୀ: ହସ୍ପାତାଳରୁ କରୋନା ସନ୍ଦିଗ୍ଧ ଫେରାର୍

ସଂଗ୍ରାମ କେଶରୀ ସେନାପତି 9:13 pm 0
କରୋନା କାହାଣୀ: ହସ୍ପାତାଳରୁ କରୋନା ସନ୍ଦିଗ୍ଧ ଫେରାର୍

ଆଜି ସୁଦ୍ଧା ୧୪୯ ରାଷ୍ଟ୍ରରେ ୧,୪୯,୧୮୧ ଜଣ କରୋନା ଆକ୍ରାନ୍ତ ଆଉ ମୃତ୍ୟୁସଂଖ୍ୟା ୫,୫୫୧ ଛୁଇଁଲାଣି । ଇଉରୋପୀୟ ରାଷ୍ଟ୍ରରେ ପରିସ୍ଥିତି ସଙ୍ଗିନ ହେବାରେ ଲାଗିଛି; ଇଟାଲିରେ ୧୨୬୬, ସ୍ପେନ୍‌ରେ ୧୩୬ ମୃତ । ଇରାନରେ ମର ଶରୀର ପୋତିବାକୁ ଅଧିକରୁ ଅଧିକ କବର ବି ଲୋଡ଼ା ପଡ଼ୁଛି ବୋଲି ସାଟେଲାଇଟ୍ ଫଟୋରୁ ଜଣା ପଡ଼ୁଛି । ଭାରତରେ ଷ୍ଟେଜ୍‌-୨ରେ ପହଞ୍ଚିଲା କରୋନାର ଏହି କରୁଣା ଦୃଶ୍ୟ, ଷ୍ଟେଜ୍‌-୩କୁ ରୋକିବା ପାଇଁ ୩୦ ଦିନ ସମୟ ଲାଗିବ ବୋଲି ଆଶା । ଭାରତରେ କରୋନାଭାଇରସ୍‌ ଆକ୍ରାନ୍ତଙ୍କ ସଂଖ୍ୟା ୧୦୭କୁ ବୃଦ୍ଧି; ଏବେଯାଏଁ ମୃତ୍ୟୁ ୨ରେ ହିଁ ଅଛି ।

ଆଜି ମୋର OPSC ପରୀକ୍ଷା ଥିଲା, ତେଣୁ ଡର ଥିଲେ ବି ଯିବାକୁ ହେଲା । ବସ୍‌ରେ ଯଦିଓ ସିଟ୍ ନୁହେଁ ସ୍ଲିପର୍ ମିଳିଲା, ହେଲେ ବାହାନଗା ପୂର୍ବରୁ ବାରିକପୁର ହାଟ ପାଖରେ ଦୁଇଟି ଟ୍ରକ୍ ସାମ୍ନାସାମ୍ନି ଧକ୍କା ହେବାଫଳରେ ରାସ୍ତା ଜାମ୍ ହେଇଯାଇଥିଲା ଆଉ ଆମେ ଯାଉଥିବା ବସ୍‌ଟି ଫେରିଆସିଲା । ଅଲଗା ଗୋଟିଏ ବସ୍‌ରେ ଗଲୁ, ପ୍ରବଳ ଭିଡ଼ ଥିଲା । କରୋନା ଭୂତାଣୁର ଟିକେ ଅଂଶ ଯଦି ସେଇଠି ଥିବ, ନିଶ୍ଚେ ସଭିଙ୍କୁ ଆକ୍ରାନ୍ତ କରିବାର ଅବସ୍ଥା ଥିଲା ସେଇଠି । ତଥାପି ପରୀକ୍ଷା ଆରମ୍ଭ ହେବା ସମୟ ଆଗରୁ ମୁଁ ପହଞ୍ଚିଗଲି ଗଭର୍ଣମେଣ୍ଟ ଆଇ.ଟି.ଆଇ., ବାଲେଶ୍ୱରରେ ।

ହେଲେ ଦୁଃଖରେ ବିଷୟ ଏହିକି ଯେ, ସେଠାକାର ୱାସ୍‌ରୁମ୍‌ରେ ପାଣି ଟୋପାଏ ବି ନାହିଁ, ଆଉ ପରିଷ୍କାର ପରିଚ୍ଛନ୍ନତାର କଥା ତ କହିଲେ ନସରେ । ଅଭିଯୋଗ କରିବୁ କାହାକୁ? ଶୁଣିବ କିଏ? ଇଏ ପରା ସରକାରୀ ଜାଗା, ସବୁଥିରେ ସରକାରୀ ଅନୁମୋଦନ ଲୋଡ଼ା ଆଉ ଯଦି ଏହାକୁ ସଫା କରିବାକୁ ଅଭିଯୋଗ କରିବା, ତେବେ ଆର ବର୍ଷ ହେଇଯାଇପାରେ । ଏଇଥିରେ ଆମେ କ'ଣ କରୋନାକୁ ରୋକିବାକୁ ସଫାସୁତୁରା ରଖିବା ବୋଲି ଆଶା କରିବା ! ଯାହା ବି ହେଉ, ପରୀକ୍ଷା ଶେଷ ହେଇଗଲା ।

ଆଜିଠାରୁ ମୋର ମୁଣ୍ଡ ବିନ୍ଧା ଆରମ୍ଭ ହେଲା; ପ୍ରଥମେ ଗୋଟିଏ ପଟ ଆଉ ପରେ ଧୀରେ ଧୀରେ ବଢ଼ିବାକୁ ଲାଗିଲା । ଲାଗୁଛି ଯେମିତି କରୋନାର ଭୟ ଆଉ ବସରେ ସେ ଭିଡ଼ ଭିତରେ ଛିଡ଼ା ହେଇକି ଯିବାର ଭୟ ମୋ ମୁଣ୍ଡର ଏମିତି ଅବସ୍ଥା କରିଛି ।

ଆସନ୍ତୁ ଦେଖିନେବା କରୋନାର ଆଉ କିଛି କଥା । ବିଭିନ୍ନ ସ୍ଥାନରେ ଜନଗହଳି ଟିକେ କମିବାରେ ଲାଗିଛି ଆଉ ଅଘୋଷିତ କର୍ଫ୍ୟୁ ହେଲାଭଳି ଅନୁଭବ ହେଉଛି । ଏହି ସମୟରେ ଜନସାଧାରଣଙ୍କ ସ୍ବାସ୍ଥ୍ୟକୁ ଦୃଷ୍ଟିରେ ରଖି ସଭା-ସମିତି, ପ୍ରେକ୍ଷାଳୟ, ଜିମ୍‌, ସୁଇମିଂ ପୁଲ୍‌, ମଲ୍ ଆଦି ବନ୍ଦ ହେଇଯାଇଛି । ତଥାପି କିଛି ସ୍ଥାନରେ ମେଳନ ଚାଲିଥିବାରୁ ଯାତ୍ରା ମଧ୍ୟ ହେଉଥିଲା । ଅବଶ୍ୟ ରାତି ଅଧରେ ଅଧାରୁ ଯାତ୍ରାକୁ ବନ୍ଦ କରାଯାଇଛି, ଯାହାକି ଏକ ଭଲ ଖବର ଭାବରେ ଆମେ ଗ୍ରହଣ କରିବା ।

ଆଜି ବି ଏତେ ଦିନ ପରେ ୨୦୨୦ ମସିହାରେ ବଧୂ ନିର୍ଯ୍ୟାତନା ହେଉଛି । ବିବାହର ମାତ୍ର ୧୨ ଦିନ ପରେ ଜଣେ ନବବଧୂକୁ କରୋନା ହେଇଥିବା ଦର୍ଶାଇ ତାଙ୍କର ପରିବାର ଲୋକ ନିର୍ଯାତନା ଦେଇଥିଲେ । ବିନା ପରୀକ୍ଷାର କାହାକୁ କ'ଣ ଏମିତି କେହି କହିପାରିବେ? ଆଉ ଯଦି ବା ତାକୁ ହେଇଛି, ସେଥିରେ ତା'ର ଭୁଲ୍ ରହିଲା କେଉଁଠି? ଅବଶ୍ୟ ଅଭିଯୋଗ ପରେ ତାଙ୍କ ସ୍ବାମୀ ଓ ଶ୍ବଶୁରଙ୍କୁ ପୋଲିସ୍ ଗିରଫ କରିଛି ଆଉ ଗିରଫ ପରେ ଅନ୍ୟ ଏକ ସତ ମଧ୍ୟ ଜଣାପଡ଼ିଛି ଯେ, କରୋନା ଖାଲି ବାହାନା ଥିଲା, ମୂଳ ଉଦ୍ଦେଶ୍ୟ ତ ଯୌତୁକରେ ଥିଲା ।

ଆଜି ରାୟଗଡ଼ା ଜିଲ୍ଲାପାଳ ସମସ୍ତ ସରକାରୀ କର୍ମଚାରୀଙ୍କ ଛୁଟି ବାତିଲ୍ କରିଦେଲେ । କିନ୍ତୁ ସେମାନେ ଅଫିସ୍ ଆସିଲେ କ'ଣ କରିପାରିବେ? ସେମାନେ କ'ଣ କରୋନା ପାଇଁ କିଛି ପ୍ରତିଷେଧକ ତିଆରି କରିପାରିବେ? ଲୋକମାନେ ଏବେ ମଧ୍ୟ ସଚେତନ ହେଉନାହାନ୍ତି, ସେଇଥିପାଇଁ ତ ଅନେକ ସ୍ଥାନରେ ପୋଲିସ୍ ତରଫରୁ ୧୪୪ ଧାରା ଜାରି କରାଯାଇଛି । ମେଳାମହୋତ୍ସବକୁ ମଧ୍ୟ ବାରଣ କରାଯାଇଛି । ଆଜି କୋଚିରୁ ଦୁବାଇ ଯାଉଥିବା ଏକ ବିମାନରେ ଜଣେ କରୋନା ରୋଗୀ ଚିହ୍ନଟ ହେବା ଫଳରେ ବାକିମାନଙ୍କୁ ମଧ୍ୟ ପରୀକ୍ଷା କରାଯିବା ସହ ସମସ୍ତ ୨୬୯ ଜଣ ଯାତ୍ରୀଙ୍କୁ ଓହ୍ଲେଇ ଦେଇଥିଲେ ।

ଏହା ଭିତରେ କିଛି ଦୁଃଖଦ ଖବର ମଧ୍ୟ ଆସିଛି, ଯାହାକି ଆମ ଲୋକମାନଙ୍କର ବେପରୁଆ ମନୋଭାବକୁ ଦର୍ଶାଉଛି । ବଜାରରେ ମାସ୍କ ଆଉ ସାନିଟାଇଜର୍‌ର ଚାହିଦା ବଢ଼ିବା ସହିତ ଅନେକ ଭୟଭୀତ ହେଇକି ଅଧିକରୁ ଅଧିକ ମାସ୍କ ଆଉ ସାନିଟାଇଜର୍ କିଣିବାରେ ଲାଗିଛନ୍ତି । ଫଳରେ ଏହି ସବୁର ଅଭାବ ବଢ଼ିବାରେ ଲାଗିଛି । ଏହି ଅଭାବର ଲାଭ ଉଠେଇ କିଛି ଅସାମାଜିକ ଲୋକ ନକଲି ମାସ୍କ ଓ ସାନିଟାଇଜର ପ୍ରସ୍ତୁତ କରିବା ଆରମ୍ଭ କରିଦେଲେଣି । ଅବଶ୍ୟ ଏହି ଅଭିଯୋଗରେ ତିନିଜଣଙ୍କୁ ପୁଲିସ ଗିରଫ କରିଛି ।

ଏହାଠାରୁ ବଡ଼ ଏକ ବେପରୁଆ କାହାଣୀ ଆସିଛି, ଯେଉଁଠି ପୁରୀ ଆଉ ବ୍ରହ୍ମପୁର ବଡ଼ ମେଡିକାଲରୁ ଜଣେ ଲେଖାଏଁ କରୋନା ସନ୍ଦିଗ୍ଧ ଲୁଚିକି ପଳେଇଛନ୍ତି । ଏ ପରିସ୍ଥିତିରେ ଏମିତି ଫେରାର୍ ହେଇଯାଇଥିବା ବ୍ୟକ୍ତିମାନେ ଅପାଠୁଆ ନୁହନ୍ତି, କିନ୍ତୁ ମୂର୍ଖ ।

ଆଗାମୀ କାଲି କ'ଣ ହେବ ସେ ବିଷୟରେ ଅଧିକ ଧାରଣା ନାହିଁ । ଏ ମୁଣ୍ଡ ବିନ୍ଧା ଭୟ ପାଇଁ ଯଦି ହେଇଥାଏ ତ ଭଲ କଥା । ତା'ଛଡ଼ା ଦୀଲ୍ଲିରୁ ଫେରିବାର ୧୫ ଦିନରୁ ଅଧିକ ହେଇଗଲାଣି, ହେଲେ ବି ସେ ଭୟ ମନରୁ ଯାଇନି ଆଉ ଆଜି ବସ୍‌ର ଏହି ଭିଡ଼ ବି ଭୟକୁ ଅଧିକ ବଢ଼େଇବା ପାଇଁ ଖୋରାକ୍ ଯୋଗେଇଛି ।

Saturday, 14 March 2020

କରୋନା କାହାଣୀ: ଭାରତରେ ୨ୟ ମୃତ୍ୟୁ

ସଂଗ୍ରାମ କେଶରୀ ସେନାପତି 8:48 pm 0
କରୋନା କାହାଣୀ: ଭାରତରେ ୨ୟ ମୃତ୍ୟୁ

କରୋନାର କାହାଣୀ ଆହୁରି କରୁଣ ହେବାରେ ଲାଗିଛି । ଦିନ ପରେ ଦିନ ଗଡ଼ିବାରେ ଲାଗିଛି ଆଉ ଆଜିସୁଦ୍ଧା ୧୧୩ ରାଷ୍ଟ୍ର ୫୧୧୬ଙ୍କର ମୃତ୍ୟୁ ହୋଇଗଲାଣି । ମାଉଣ୍ଟ ଏଭେରେଷ୍ଟ ଚଢ଼ିବାକୁ ବନ୍ଦ କଲେଣି ଚୀନ ଆଉ ନେପାଳ ଭଳି ଦେଶ । ଭାରତ ବିଭିନ୍ନ ଦେଶ ସହ ବିମାନ ସେବା ବନ୍ଦ କରିବାରେ ଲାଗିଥିବାବେଳେ ସୀମା ସେପଟରକୁ ରେଳ ଆଉ ବସ୍ ଚଳାଚଳ ବନ୍ଦ ହେଲାଣି । ଆମେରିକାର ରାଷ୍ଟ୍ରପତି ଡୋନାଲ୍ ଟ୍ରମ୍ ବି କରୋନା ପାଇଁ ଭୟଭୀତ ହେବାକୁ ଲାଗିଛନ୍ତି, ନିଜ ସ୍ୱାସ୍ଥ୍ୟାବସ୍ଥା ପରୀକ୍ଷା କରେଇବା ସହ ହାତ ନ ମିଳେଇ ଲୋକଙ୍କୁ ନମସ୍କାର କରିବା ଆରମ୍ଭ କଲେଣି ।

ଦିଲ୍ଲୀର ଜଣେ ୬୯ ବର୍ଷୀୟ ମହିଳା କରୋନାର ଶିକାର ହୋଇଥିବାବେଳେ କେରଳ କୋଟ୍ଟାୟାମ ହସ୍ପିଟାଲରେ ଜଣେ କରୋନା ସନ୍ଦିଗ୍ଧ ୭୨ ବର୍ଷୀୟ ବ୍ୟକ୍ତି ପ୍ରାଣ ହରାଇଛନ୍ତି । ଏହାପରେ ଓଡ଼ିଶାରେ ବାଚସ୍ପତି ବିଧାନ ସଭା ମୁଲତବୀ କରିବା ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମାର୍ଚ୍ଚ ୩୧ ପର୍ଯ୍ୟନ୍ତ ସମସ୍ତ ସ୍କୁଲ୍, କଲେଜକୁ ବନ୍ଦ କରିବା ସହ ଟିଉସନ୍ ମଧ୍ୟ ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି । ପରିସ୍ଥିତିକୁ ଯେତେ ସହଜରେ ନେଉଥିଲୁ, ଏବେ ଆଉ ସେମିତି ହେବାଭଳି ଲାଗୁନାହିଁ । ସ୍କୁଲ୍ ବନ୍ଦ, କିନ୍ତୁ ପରୀକ୍ଷା ହେବ । ଆଉ ପରୀକ୍ଷା ବେଳେ କ'ଣ ସତରେ କରୋନା ବ୍ୟାପିବନି?

ବିଭିନ୍ନ ଦେଶରୁ ଭାରତୀୟଙ୍କୁ ଫେରେଇ ଆଣିବା କାର୍ଯ୍ୟ ମଧ୍ୟ ଚାଲିଛି । ବିନା ଦର୍ଶକରେ ଭାରତ-ଦକ୍ଷିଣ ଆଫ୍ରିକା କ୍ରିକେଟ୍ ମ୍ୟାଚ୍ ଦଶର୍କ ବିହୀନ କରିବା ପାଇଁ ଚିନ୍ତା କରିବା ପରେ ଏହାକୁ ବନ୍ଦ ମଧ୍ୟ କରାଗଲା ଆଜି । ଅପ୍ରେଲ ୧୫ରୁ ଆରମ୍ଭ ହେବାକୁ ଥିବା IPL ମଧ୍ୟ ଘୁଞ୍ଚିଗଲା । ବଡ଼ ବଡ଼ ଲୋକମାନେ ସତର୍କତାମୂଳକ ଭିଡ଼ିଓ ତିଆରି କରି ସେୟାର କରୁଛନ୍ତି ।

କିନ୍ତୁ ତଥାପି ଏହି ସମୟରେ ବି ଆମର ଲୋକମାନେ ଗୁଜବ ଖେଳେଇବାରେ ବ୍ୟସ୍ତ ଅଛନ୍ତି । କେତେବେଳେ ଜଗନ୍ନାଥଙ୍କର ନାଁ କହିକି ସୂର୍ଯ୍ୟୋଦୟ ପୂର୍ବରୁ ତୁଳସୀପତ୍ର ଖାଇଲେଣି ତ ପୁଣି କେବେ ଆହୁରି କେତେ କ'ଣ କଲେଣି । ଖାଲି ଲୋକମାନେ ନୁହନ୍ତି, ବିଭିନ୍ନ ସଂଗଠନ ତରଫରୁ ମଧ୍ୟ କିଛି ଏମିତି ପ୍ରଚାର ଚାଲିଛି, ଯାହାକୁ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ମଧ୍ୟ ବାରମ୍ବାର ଖଣ୍ଡନ କରୁଛି । ତଥାପି ଲୋକମାନେ ମାନିବାକୁ ନାରାଜ ।

ଏମିତି ଗୁଜବ ଖେଳେଇ କେହି କେହି ଗିରଫ ମଧ୍ୟ ହେଲେଣି । ହେଲେ ଅନେକ ସତ କ'ଣ ଜାଣିବାକୁ ଚାହୁଁନାହାନ୍ତି । ଏବେ ତ ପରିସ୍ଥିତି ଏମିତି ହେଲାଣି ଯେ, ଯଦି ସତ ଖବର କିଛି ବି ଆସୁଛି, ତାହା ସତ କି ମିଛି ଜଣାପଡ଼ୁନି ।

ଏ ସବୁ ଭିତରେ ଗୋଟିଏ ଖୁସିର କଥା ହେଉଛି କି ଭାରତ ବର୍ଷରେ ୧୦ ଆକ୍ରାନ୍ତ ସୁସ୍ଥ ହେଲେଣି । ଏହାକୁ ନେଇ ଲୋକମାନଙ୍କ ମଧ୍ୟରେ କିଛିଟା ଆଶା ସଞ୍ଚାର ହେବାରେ ଲାଗିଛି । ଓଡ଼ିଶାର କିନ୍ତୁ ଚାରିଆଡ଼େ ଆକ୍ରାନ୍ତ ହେବା ଆଶଙ୍କା କରି ଲୋକମାନେ ଭୟଭୀତ ହେବାରେ ଲାଗିଛନ୍ତି । ୮୩ ଆକ୍ରାନ୍ତ ଭାରତୀୟମାନଙ୍କ ମଧ୍ୟରୁ ଓଡ଼ିଶାରୁ ଯଦିଓ ଏ ପର୍ଯ୍ୟନ୍ତ କେହି ବି ନାହାନ୍ତି, ତଥାପି ସତର୍କତା ମୂଳକ ସରକାରୀ ଏବଂ ଡାକ୍ତରୀ ପଦକ୍ଷେପକୁ ମାନିବା ନିହାତି ଆବଶ୍ୟକ ।

ଆଜି ରାଜ୍ୟ ସରକାର ସୁବ୍ରତ ବାଗ୍‌ଚୀଙ୍କୁ ଏକ ନୂଆ ଦାୟିତ୍ୱ ଦେଇଛନ୍ତି; ସଚେତନତା ସୃଷ୍ଟି କରିବା ଉପରେ ବିଭିନ୍ନ ସଂଗଠନକୁ ଏବେ ସେ ନିୟନ୍ତ୍ରଣ କରିବେ । ତଥାପି ରାଜ୍ୟରେ ୧୪୧ ଜଣ ଲୋକ ନିରୀକ୍ଷଣରେ ଅଛନ୍ତି । ଆଗକୁ ଭଲ ହେବ ବୋଲି ଆଶା କରିବା ଦରକାର ପଡ଼ୁଛି ।

କାଲି ପରୀକ୍ଷା ପାଇଁ ମୋତେ କିନ୍ତୁ ବସରେ ଯିବାକୁ ହେବ । ଭୟ ତ ଅଛି ନିଶ୍ଚୟ; କିନ୍ତୁ ଯିବାକୁ ହେବ । ସ୍କୁଲ୍ ସିନା ବନ୍ଦ ହେଇଗଲା, ହେଲେ ଏ ପରୀକ୍ଷା?

Friday, 13 March 2020

କରୋନା କାହାଣୀ: ଲେଖିବା ଦରକାର କି?

ସଂଗ୍ରାମ କେଶରୀ ସେନାପତି 7:45 pm 0
କରୋନା କାହାଣୀ: ଲେଖିବା ଦରକାର କି?

ଆଜି ଭାରତରେ କରୋନା ଭୂତାଣୁ ଯୋଗୁଁ ପ୍ରଥମ ମୃତ୍ୟୁ ଘଟିଲା । କର୍ଣ୍ଣାଟକର କଲ୍‌ବର୍ଗୀ ଅଞ୍ଚଳର ୭୬ ବର୍ଷୀୟ ସେହି ବ୍ୟକ୍ତିଙ୍କର ମୃତ୍ୟୁ ସହ ଆଜି ସୁଦ୍ଧା ଭାରତର ଆକ୍ରାନ୍ତ ସଂଖ୍ୟା ୭୪ ଛୁଇଁଲାଣି । ସାରା ବିଶ୍ୱରେ ଏବେଯାଏଁ ମୃତ୍ୟୁ ସଂଖ୍ୟା ୪୭୦୦ରୁ ବି ଅଧିକ ହେଇଗଲାଣି । ଚୀନ୍ ପରେ ଏବେ ଇଟାଲୀର ଅବସ୍ଥା ମଧ୍ୟ ଆହୁରି ଖରାପ ହେବାରେ ଲାଗିଲାଣି ।

କରୋନା ବିଷୟରେ ଆଜି ନୁହେଁ ବେଶ୍ କିଛିଦିନ ମାନେ କିଛିମାସ ତଳୁ ଯଦିଓ ମୁଁ ଜାଣିଲିଣି, ତଥାପି ତା' ଭିତରେ ବି ଡରି ଡରି ଦୀଲ୍ଲିଯାଇ ଫେରି ଆସିଲି । ସେଠାରେ ସତର୍କତା ମୂଳକ ସେମିତି କିଛି ନଥିଲା, ଅବଶ୍ୟ ଫେରିବାଦିନ ସେ ପୋଡ଼ାଜଳା ବିଷୟରେ କଲିକତାରେ ଜାଣିଲି ଆଉ ସେତେବେଳକୁ ମୁଁ ନିଜକୁ ସୁରକ୍ଷିତ କରିସାରିଥିଲି ।

କିନ୍ତୁ ଏ କରୋନାର କାହାଣୀ ସେବେ କାହିଁକି ଲେଖିଲିନି? ଆଗରୁ ତ ଲେଖିପାରିଥାନ୍ତି । କ'ଣ ସତରେ ମୁଁ ଏହି ରୋଗର ଭୟାବହତାକୁ ମୁଁ ହୃଦ୍‌ବୋଧ କରିପାରିନଥିଲି? ନା ଆଜିର ଏହି ମୃତ୍ୟୁ ମୋତ ଭୟଭୀତ କରୁଛି?

ସତ କ'ଣ ଜଣାନାହିଁ, ତଥାପି ସତର୍କ ରହିବାକୁ ଯଥା ସମ୍ଭବ ଚେଷ୍ଟା କରୁଛି । ଗତ ମାର୍ଚ୍ଚ ୭ରେ ଦୀପକ କରଙ୍କର ଗୋଟିଏ ଟୁଇଟ୍ ଥ୍ରେଡ୍ ଆସିଥିଲା ମାସ୍କ ବ୍ୟବହାର ଉପରେ, ଯାହାକି ବିଶ୍ୱ ସ୍ୱାସ୍ଥ୍ୟ ସଂଗଠନର ଏକ ରିପୋର୍ଟର ଅନୁବାଦ ଥିଲା । ତାକୁ ଶୁଭପଲ୍ଲବରେ ପୋଷ୍ଟ କରିଥିଲି; ମାସ୍କ ବ୍ୟବହାର ଉପରେ ଲୋକଙ୍କ ସତର୍କ କରେଇବା ପାଇଁ । କପଡ଼ା ମାସ୍କ ବ୍ୟବହାର ନ କରିବା ପାଇଁ । ହେଲେ ଏବେ ସବୁଠି ଖାଲି କପଡ଼ା ମାସ୍କ ହିଁ ମିଳୁଛି, ଯାହାର ଦାମ୍ ୧୦/- ଥିଲା, ହେଲେ ଏବେ ତା'ର ଦାମ୍ ୫୦/-ରୁ ଅଧିକ ହେଇଗଲାଣି । ଅନେକ ସ୍ଥାନରେ ସେହି ମାସ୍କ ବି ମିଳୁନି ।

ଆଗାମୀ ୧୫ ତାରିଖରେ ମୋର OPSCର ପରୀକ୍ଷା ଅଛି, କ'ଣ ହେବ ଜଣାନାହିଁ । କିନ୍ତୁ ଯାହା ବି ହେଉ, କରୋନା ଉପରେ କେମିତି କ'ଣ ଚାଲିଛି, ତା' ଉପରେ କିଛି କିଛି କଥା ନିତିଦିନ ଏଇଠି ଲେଖିବାକୁ ଚେଷ୍ଟା କରିବି । କେତେବେଳେ କ'ଣ ହେବ କିଛି ଜଣାନାହିଁ, କିନ୍ତୁ ଯେତିକି ସମୟଯାଏଁ ଅବସ୍ଥା ଭଲ ଥିବ, ସେବେଯାଏଁ ଚାଲିଥିବ ।

Thursday, 13 February 2020

ତୁମ ଅପେକ୍ଷାରେ

ସଂଗ୍ରାମ କେଶରୀ ସେନାପତି 1:41 am 0
ତୁମ ଅପେକ୍ଷାରେ

"ଆଉଥରେ ଆଜି ମୋ ମନର ସେ ଅକୁହା
କଥାକୁ ତମ ଆଗେ ଖୋଲି କହିବାକୁ ଚାହୁଁଛି,
ତମେ ତ ଜାଣିଛ ମୁଁ ତମକୁ କେତେ ଭଲ ପାଉଛି ।"
ଦିନ ପରେ ଦିନ ଗଡ଼ିଚାଲିଛି ଆଉ ଯେତେ ଅଧିକ ସମୟ ବିତି ଚାଲିଛି, ବୋଧେ ସାପର ବିଷ ଚରିଗଲା ଭଳିଆ ଆମର ସେହି କେଇଦିନର ସମ୍ପର୍କର ମିଠା ସ୍ମୃତିସବୁ ମୋ ଭିତରେ ବଢ଼ିବଢ଼ି ଚାଲିଛି । ମୋ ମନର ମାନସ ପଟଳରେ ବାରମ୍ବାର ସେହି ଛବିସବୁ ଆସି ଘୁରିବୁଲୁଛି । ସେଦିନର ସେ ଶେଷ ସାକ୍ଷାତ କଥା ମଧ୍ୟ ଆଜି ସବୁଠୁ ଅଧିକ ପଡ଼ୁଛି ଆଉ ସେଦିନ ତମକୁ କହିପାରିନଥିବା ସେହି କେଇପଦ କଥା ଯେମିତି ମୋତେ ସବୁବେଳେ ଅଟ୍ଟହାସ୍ୟ କରୁଛି ।

ବିନି ତମର ମନେ ଅଛି ନା ତିନି ବର୍ଷ ତଳେ ଯେତେବେଳେ ତମେ ପ୍ରଥମଥର ମୋତେ ଭେଟିବାକୁ ଆସିଥିଲ? ହୁଏତ ତମର ସେ କଥା ସବୁ ମନେ ନଥିବ, କିନ୍ତୁ ମୋର ଭଲ ଭାବରେ ମନେ ଅଛି । ଏହି ଯେଉଁ ସିମେଣ୍ଟର ଚୌକି ଦେଖୁଛ, ସେଇଠି ହିଁ ଆମେ ପ୍ରଥମେ ବସିଥିଲେ । ପ୍ରଥମେ କ'ଣ ଯେ, ଯେତେବେଳେ ଆସୁଥିଲେ ସବୁବେଳେ ହିଁ ଏଇଠି ବସୁଥିଲେ । ସେଦିନ ପ୍ରଥମେ ଦେଖାରେ ତମେ ଯେତିକି ଉତ୍ସାହିତ ଥିଲ, ତମ ଭିତରେ ଥିବା ସେତିକି ଡର ମୁଁ ଭଲ ଭାବରେ ଦେଖିପାରୁଥିଲି ।

ସେ ଡର ଭିତରେ ତମର କଥାସବୁ ଯେତେ ଧୀରେ ଶୁଭୁଥିଲା, ସେତେ ଅଧିକ ମିଠା ଲାଗୁଥିଲା । ପ୍ରଥମେ ଦେଖାର ପ୍ରଥମ ଅନୁଭୂତି ସବୁଠାରୁ ନିଆରା ଅବଶ୍ୟ, ବୋଧେ ସେଦିନର ସେ ମିଠା ଅନୁଭୂତି ସହ ତମର ସେ ଡର ଆଉ ଲାଜ ମିଶା ଆଳାପ ତାକୁ ଦୀର୍ଘସ୍ଥାୟୀ କରିବାକୁ ବାଧ୍ୟ କରିଦେଇଥିଲା । ଏହାପରେ ଅବଶ୍ୟ ଅନେକ ଥର ଦେଖାହେଇଛି, କିନ୍ତୁ ପ୍ରତ୍ୟେକ ଭାଲେଣ୍ଟାଇନ୍ ଡେ'ରେ ଦେଖାହେବାର ସେ ଯେଉଁ ପ୍ରତିଜ୍ଞା ବୋଧେ ତମେ ଭୁଲିଯାଇଛ ! ହେଲେ ଦେଖ ମୁଁ ଆଦୌ ଭୁଲିନି, ସେଇଥିପାଇଁ ତ ଖାଲି ଭାଲେଣ୍ଟାଇନ୍ ଡେ'ରେ ନୁହେଁ ପ୍ରତ୍ୟେକ ଦିନ ଏଠାକୁ ଆସୁଛି ଆଉ କାଳେ କେବେ ତମ ସହ ଦେଖାହେଇଯିବ ସେହି ଆଶା ନେଇ ପାର୍କ ଖୋଲିବାଠାରୁ ବନ୍ଦ ହେବାଯାଏଁ ଏଠାରେ ବସୁଛି ।

Wednesday, 12 February 2020

ଦିଲ୍ଲୀରେ ମୋଦିଙ୍କ ବିଶାଳ ବିଜୟ

ସଂଗ୍ରାମ କେଶରୀ ସେନାପତି 1:30 am 0
ଦିଲ୍ଲୀରେ ମୋଦିଙ୍କ ବିଶାଳ ବିଜୟ

୨୦୨୦ ଦିଲ୍ଲୀ ନିର୍ବାଚନରେ ଅରବିନ୍ଦ କେଜରିୱାଲଙ୍କ ବିଶାଳ ବିଜୟ ପାଇଁ ତାଙ୍କୁ ବହୁତ ବହୁତ ଅଭିନନ୍ଦନ ଜଣାଉଛି । ଆପଣମାନେ କହିବେ, ଶୀର୍ଷକରେ ମୋଦି ଜିତିଲେ ବୋଲି ମିଛ କଥାଗୁଡ଼ା ଲେଖିକି କ'ଣ ୟୁ-ଟ୍ୟୁବ୍ ଭିଡ଼ିଓ ଭଳିଆ ଆଉ କିଛି ଦେଖେଇଲୁଣି; ତେଣୁ ଅଧିକ ବକର ବକର ନ ହେଇକି ସିଧା ମୁଁ ମୋର ମନ୍ତବ୍ୟ ରଖୁଛି । ଅବଶ୍ୟ ୟୁ-ଟ୍ୟୁବ୍ କଥା ଉଠିଲାଣି ମାନେ ଆଗତୁରା ସୂଚେଇ ଦେବାକୁ ଚାହେଁ କି, ଏହା କେବେଳ ଏକ ବ୍ୟଙ୍ଗାତ୍ମକ ଢଙ୍ଗରେ ଲେଖୁଛି, ଆଦୌ ଦେହକୁ ନେବେନି । ଆମେ ଏବେଯାଏଁ ବି ଅଣରାଜନୈତିକ ହେଇକି ଅଛୁ । ଚାଲନ୍ତୁ ଏବେ ଆରମ୍ଭ କରିବା ।

୨୦୧୪ ସାଧାରଣ ନିର୍ବାଚନରେ ମାନ୍ୟବର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମହୋଦୟ ବିଜୟୀ ହେବାପରେ ସେହି ବର୍ଷ ସ୍ୱାଧୀନତା ଦିବସ ଦିନ ସ୍ୱଚ୍ଛ ଭାରତ ଅଭିଯାନ ଆରମ୍ଭ କରିବା ଯୋଜନା ବିଷୟରେ ଜଣେଇଲେ ଏବଂ ପରେ ୨ ଅକ୍ଟୋବର ୨୦୧୪ରେ ହାତରେ "ଝାଡ଼ୁ" ଧରି ଏହାକୁ ବିଧିବଦ୍ଧ ଭାବରେ ଶୁଭାରମ୍ଭ କଲେ । ଗାନ୍ଧୀ ଜୟନ୍ତି ଅବସରରେ ଗାନ୍ଧୀଙ୍କର ସେ ରାମରାଜ୍ୟ ଗଠନ ଦିଗରେ ସେ ପାଦେ ଅଗ୍ରସର ହେଲେ ଆଉ ଅଳିଆ ପୂର୍ଣ୍ଣ ରାମରାଜ୍ୟ କରିବା ଆଗରୁ ସ୍ୱଚ୍ଛ ରାମରାଜ୍ୟ କରିବାକୁ ନିଷ୍ପତ୍ତି ନେଲେ ଏବଂ ଅନ୍ୟମାନଙ୍କୁ ମଧ୍ୟ ଝାଡ଼ୁ ଧରି ଆଗେଇ ଆସିବାକୁ ଆହ୍ୱାନ ଦେଲେ ।

ତା'ପରେ ଅନେକ ଲୋକ ହାତରେ ଝାଡ଼ୁ ଧରି କେମିତି କ'ଣ ସବୁ କ'ଣ ଆଉ କେତେ ଅଳିଆ ସଫା କଲେ, ତାହା ତ ଆପଣମାନେ ଜାଣିଛନ୍ତି । ସେ ଯାହା ବି ହେଉ ଖବରରେ ରହିବାକୁ ହେଉ ବା ସୋସିଆଲ ମିଡିଆରେ ପ୍ରଶଂସା ସାଉଁଣ୍ଟିବାକୁ ହେଉ, ଲୋକେ ତ ଝାଡ଼ୁ ଧରିଲେ ହାତରେ । ଯଦି ଆମେ ମଦର ଟେରେସାଙ୍କ କଥାକୁ ମନେ ପକାଇବା, "ତମେ ନିଜେ ନିଜ ଘର ଆଗକୁ ପରିଷ୍କାର ରଖ, ଦେଖିବ ଦୁନିଆ ସଫା ହେଇଯିବ ।" ସେହି ଧାରାରେ ଲୋକମାନେ ବି ନିଜ ଅଞ୍ଚଳ ସଫା ରଖିବାର ଦାୟିତ୍ୱ ନିଜ ହାତକୁ ନେଇ ଝାଡ଼ୁ ଧରି ବାହାରି ପଡ଼ିଲେ, ଆଉ ସଭିଏଁ ସେ ଝାଡ଼ୁ ପ୍ରେମରେ ଉବୁଟୁବୁ ହେଲେ ।

କିନ୍ତୁ ସ୍ୱଚ୍ଛ ଭାରତ ଯୋଜନାରେ ଏ ଝାଡ଼ୁ ଧରି ଫଟୋ ଉଠାଇବାକୁ ଆହ୍ୱାନ ଦେବା ଆଗରୁ ବୋଧେ ମୋଦି ଆଜ୍ଞା ଗୋଟିଏ କଥାକୁ ବୋଧେ ଭୁଲିଯାଇଥିଲେ ଆଉ ତାହା ହେଉଛି ଝାଡ଼ୁ ଆଉ ସାଧାରଣ ଝାଡ଼ୁ ହୋଇନାହିଁ । ୨୦୧୨ ପରେ ସେ ଆମ୍ ଆଦ୍‌ମିର ଏକ ଦଳୀୟ ଚିହ୍ନ ହୋଇସାରିଛି । ଇଏ ହେଉଛି ସେହି ଦଳ ଯେଉଁ ଦଳ ଏଥର ନିର୍ବଚନରେ ଏତେ ସଂଖ୍ୟାରେ ବିଜୟୀ ହେଲା । ହୁଏତ ସାଧାରଣ ଜନମାନସ ଝାଡ଼ୁଧରି ବୁଲିଥିବା ଆମ୍ ଆଦ୍‌ମିର କର୍ମକର୍ତ୍ତା ତଥା କେଜରିୱାଲ ଆଜ୍ଞାଙ୍କର ଅନୁଗାମୀମାନଙ୍କୁ ସ୍ୱଚ୍ଛ ଭାରତ ଅଭିଯାନର ପ୍ରଚାର କରୁଥିବା କିମ୍ବା ସ୍ୱଚ୍ଛ ଭାରତ ଅଭିଯାନରେ ସ୍ୱଚ୍ଛତା ପାଇଁ କାମ କରୁଥିବା ମୋଦୀଙ୍କ ଅନୁଗାମୀ ଭାବି ଭୋଟ୍ ବାଡ଼େଇଦେଲେ ।

ଏହି ପରାଜୟ ପାଇଁ ମୋଦି ଆଜ୍ଞା ଦୁଃଖ ନ କରି ଖୁସି ହେବାକୁ ଅନୁରୋଧ । ସଭିଙ୍କ ହାତରେ ଝାଡ଼ୁ ଧରାଇ ଭାରତକୁ ସ୍ୱଚ୍ଛତା ଅଭିମୁଖେ ନେଇଯିବା ପାଇଁ ସେ ଯେଉଁ ସ୍ୱପ୍ନ ଦେଖିଥିଲେ, ତାହା ଆଜି ଲୋକମାନେ ପୂରଣ କରିଛନ୍ତି । ଲୋକମାନେ ଫୁଲ ବଦଳରେ ଝାଡ଼ୁକୁ ଅଧିକ ପସନ୍ଦ କରିଛନ୍ତି । ରାଜନୀତିରେ ତେଣିକି ଯେତେ ଛକାପଞ୍ଜା ଥାଉ ନା କାହିଁକି, ଦେଶକୁ ସ୍ୱଚ୍ଛ କରିବା ପାଇଁ ମଧ୍ୟ ହାତରେ ଝାଡ଼ୁ ଉଠାନ୍ତୁ ଆଉ ଯଦି ବି ଝାଡ଼ୁ ଉଠାଇ ପାରୁନାହାନ୍ତି, ତେବେ ଅଳିଆ ଆବର୍ଜନ ସେହି ସ୍ଥାନରେ ପକାନ୍ତୁ, ଯେଉଁସ୍ଥାନରେ ଲୋକମାନେ ଝାଡ଼ୁ ଉଠାଉଛନ୍ତି ।

ଶେଷରେ ମୋଦି ଆଜ୍ଞାଙ୍କୁ ମଧ୍ୟ ଏହି ବିଜୟ ପାଇଁ ଶୁଭେଚ୍ଛା ଜଣାଇବି । ଦିଲ୍ଲୀରେ ସରକାର ଗଠନରେ ସଫଳ ହୋଇନପାରିଲେ ମଧ୍ୟ ସ୍ୱଚ୍ଛ ଭାରତ ଅଭିଯାନର ସ୍ୱପ୍ନ କିନ୍ତୁ ଫଳବତୀ ହେବାକୁ ଯାଉଛି ।

Saturday, 1 February 2020

ପୁଅମାନେ ରୋଷେଇ ଶିଖିବା କ'ଣ ସତରେ ଜରୁରୀ?

ସଂଗ୍ରାମ କେଶରୀ ସେନାପତି 12:33 am 0
ପୁଅମାନେ ରୋଷେଇ ଶିଖିବା କ'ଣ ସତରେ ଜରୁରୀ?

ମୁଁ ଷଷ୍ଠ ଶ୍ରେଣୀରେ ପଢ଼ୁଥିବାବେଳେ ପ୍ରଥମଥର ପାଇଁ ନିଜ ହାତରେ ନିଜ ପାଇଁ ରୋଷେଇ କରିଥିଲି । ପୂର୍ବରୁ ଯଦିଓ କେବେ ଗ୍ୟାସ୍ ବି ଲଗେଇନଥିଲି, ଦିନେ ଘରେ କେହି ନଥିବାବେଳେ ଭୋକର ଜ୍ୱାଳା ମେଣ୍ଟେଇବା ପାଇଁ ରୋଷେଇ କରିବା ନିହାତି ଜରୁରୀ ହୋଇ ପଡ଼ିଥିଲା । ଅବଶ୍ୟ ପ୍ରଥମ ରୋଷେଇ ସେତେ ଭଲ ହୋଇନଥିଲା, କିନ୍ତୁ ଖରାପ ବି ହୋଇନଥିଲି । ପରେ ଅନେକ ସମୟରେ ଘରେ କେହି ନଥିବାବେଳେ ମୁଁ ରୋଷେଇ କରିଛି, କିନ୍ତୁ ଇଂଜିନିୟରିଂର ପ୍ରଥମ ବର୍ଷରେ ରୋଷେଇ ନିଜେ କରିବା କେତେ ଜରୁରୀ ସେ ବିଷୟରେ ଅବଗତ ହିଁ ହେଲି । ଦିନେ ଜିଲ୍ଲା କଂଗ୍ରେସ ପକ୍ଷରୁ କଳାହାଣ୍ଡି ଜିଲ୍ଲା ବନ୍ଦ ଡାକରା ଦିଆଯାଇଥିଲା, ତେଣୁ ସକାଳଠାରୁ ସନ୍ଧ୍ୟାଯାଏଁ ଭବାନୀପାଟଣା ସହରର ସମସ୍ତ ଦୋକାନ ବନ୍ଦ ଥାଏ, ଫଳରେ ଦିନସାରା ଉପାସ ରହିବାକୁ ପଡ଼ିଲା । ସନ୍ଧ୍ୟାରେ କିନ୍ତୁ ଗୋଟିଏ ସାଙ୍ଗ ଦେଖାହେଲା, ଯାହାର ରୁମ୍‌ରେ ସେମାନେ ନିଜେ ରୋଷେଇ କରୁଥିଲେ, ତେଣୁ ତାଙ୍କପାଇଁ ବନ୍ଦର କୌଣସି ପ୍ରଭାବ ପଡ଼ିଲାନାହିଁ । ଏହାପରଠାରୁ ଆମେ ବି ନିଜେ ନିଜ ରୁମ୍‌ରେ ରୋଷେଇ କଲୁ ଆଉ ଇଂଜିନିୟରିଂରେ ଆମେ ବୈଷୟିକ ବିଦ୍ୟା ଯାହା ଶିଖୁ କି ନଶିଖୁ ରୋଷେଇ ବିଦ୍ୟାଟା ଭଲରେ ଶିଖିଗଲୁ ।

ହେଲେ ଆଜି ୭ ବର୍ଷ ପରେ ପୁଣିଥରେ ସେ ବିଷୟରେ କାହିଁକି ଆଲୋଚନା କରୁଛି? ଏହାର କାରଣ ହେଲା, କିଛିଦିନ ତଳେ ଏକ କାର୍ଯ୍ୟକ୍ରମରେ ନାରୀ ସମ୍ମାନ ଉପରେ ଭାଷଣ ଦେଉଦେଉ ପୋଲିସ୍ କମିଶନର୍ ଡ. ସୁଧାଂଶୁ ଷଡ଼ଙ୍ଗୀ ପଦେ କହିଥିଲେ, "ଯେଉଁ ପୁଅମାନେ ରୋଷେଇ ଶିଖିନାହାନ୍ତି, ତାଙ୍କୁ ଝିଅମାନେ ବିବାହ କରିବା ଉଚିତ ନୁହେଁ ।" ଏହି କଥାର ସାରମର୍ମ କ'ଣ ଥିଲା? ଆଉ ସେ ଏହି କଥା କେତେବେଳେ କେଉଁ ସମୟରେ ଆଉ କେଉଁ ସ୍ଥାନରେ କହିଥିଲେ, ସେ ବିଷୟରେ ଅବଗତ ହେବା ପୂର୍ବରୁ ଅନେକ ନିଜେ ନିଜର ମତ ରଖିଦେଲେ । କିଏ ତାଙ୍କୁ ସିଧାସଳଖ ବିରୋଧ କଲା ତ ପୁଣି କିଏ କେତେ କଟାକ୍ଷ କଲା ।

ଏ ସ୍ୱାଧୀନ ଦେଶରେ ସ୍ୱ-ମତ ରଖିବାର ଅଧିକାର ସମସ୍ତଙ୍କର ଅଛି, ତେଣୁ ସେ ତାଙ୍କର ମତ ରଖିଲେ । ହେଲେ ତାଙ୍କୁ ବିରୋଧ କରୁଥିବା ଲୋକଙ୍କୁ ମୋର ପ୍ରଶ୍ନ, ଯଦି ଆପଣ ରୋଷେଇ କରିବା ଶିଖିବେ ତେବେ କ'ଣ ପାପ ଲାଗିବ ନା ମୃତ୍ୟୁପରେ ଆପଣ ନର୍କକୁ ଯିବେ ବୋଲି ଆପଣଙ୍କର ଜ୍ୟୋତିଷ ମହାଶୟ କହିଛନ୍ତି? ରୋଷେଇ ଶିଖିଥିଲେ ବେଳଅବେଳରେ ବି ସାହାଯ୍ୟ ତ ହୋଇପାରିବ । ଅବଶ୍ୟ କେତେଜଣ ମତ ଦେଲେ କି ଆଜିର ସ୍ମାର୍ଟ ଫୋନ୍‌ର ସ୍ମାର୍ଟ ଯୁଗରେ ଯେତେବେଳେ ଅନ୍‌ଲାଇନ୍‌ରେ ଖାଇବା ଅର୍ଡ଼ର୍ କଲେ ୩୦ ମିନିଟ୍‌ରେ ପହଞ୍ଛୁଛି, ରୋଷେଇ ଶିଖିବା ଦରକାର କ'ଣ? ସେମାନଙ୍କ ପାଇଁ ଗୋଟିଏ ଉପଦେଶ, ଗତବର୍ଷ ଫନି ବାତ୍ୟାରେ ଭୁବନେଶ୍ୱରରେ ଥିବା ବନ୍ଧୁମାନଙ୍କୁ ଥରେ ପଚାରନ୍ତୁ କେମିତି ଥିଲେ ସେମାନେ ।

ନାରୀ ସଶକ୍ତିକରଣ ପାଇଁ ଖାଲି କଥାରେ କହିଲେ କି ଭାଷଣ ଦେଇଦେଲେ ହେବନି, ନାରୀକୁ ବୁଝିବା ଦରକାର, ପ୍ରତ୍ୟେକ ପାହାଚରେ ପାଦ ସହ ପାଦ ମିଶେଇ ଚାଲିବା ଆବଶ୍ୟକ । ଏ ଦେଶର ପ୍ରାଚୀନ ସଂସ୍କୃତି ଓ ପରମ୍ପରା ନାରୀକୁ କେତେ ସମ୍ମାନ କରୁଥିଲା, ତାହା ପୋଥିପୁରାଣରେ ହଜିଯିବା ପୂର୍ବରୁ ନାରୀଶକ୍ତିର ମହତ୍ୱ ବୁଝିବା ଦରକାର । "ଝିଅ ଜନମ ଚୂଲି ମୁଣ୍ଡକୁ" ପଦକୁ ଯଦି ଆପଣେଇ ବସିବେ, ତେବେ ଆପଣ ବି ସେହି ସମୟକୁ ଫେରିଯିବେ, ଯେଉଁ ସମୟରେ ଏହି ପଦଟି ରଚନା କରାଯାଇଥିଲା ।

ସଂଗ୍ରାମ କେଶରୀ ସେନାପତି
ସମ୍ପାଦକ, ଶୁଭପଲ୍ଲବ
ମୋ- 7008899643

ବି.ଦ୍ର.: ଏହି ଲେଖାଟି ୨୦୨୦ ମସିହାର ଜାନୁଆରୀ ମାସ ୨୨ ତାରିଖରେ ଓଡ଼ିଆ ରିପୋର୍ଟର ଖବର କାଗଜରେ ପ୍ରକାଶିତ ହୋଇଥିଲା । ଏହି ଲିଙ୍କ୍ https://epaper.odishareporter.in/c/48204149 ଜରିଆରେ ଏହାକୁ ମଧ୍ୟ ପଢ଼ିପାରିବେ ।

Thursday, 23 January 2020

ବଡ଼ ଲୋକଙ୍କ ଜୀବନି: ବୀର ସୁରେନ୍ଦ୍ର ସାଏ

ସଂଗ୍ରାମ କେଶରୀ ସେନାପତି 12:55 pm 0
ବଡ଼ ଲୋକଙ୍କ ଜୀବନି: ବୀର ସୁରେନ୍ଦ୍ର ସାଏ

ଯଦିଓ ୧୮୫୭ ମସିହାର ସିପାହୀ ବିଦ୍ରୋହକୁ ପଲାସୀ ଯୁଦ୍ଧପରେ ଭାରତର ପ୍ରଥମ ସ୍ୱାଧୀନତା ସଂଗ୍ରାମ ବୋଲି ଗଣନା କରାଯାଏ, କିନ୍ତୁ ଏହାର ୩୦ ପୂର୍ବରୁ ଜଣେ ଅଗ୍ରଣୀ ନେତା ଇଂରେଜମାନଙ୍କ ବିରୁଦ୍ଧରେ ଆନ୍ଦୋଳନ ଆରମ୍ଭ କରିଥିଲେ । ଏହି ବୀର ଜଣଙ୍କ ଆଉ କେହି ନୁହନ୍ତି, ସେ ହେଉଛନ୍ତି ବୀର ସୁରେନ୍ଦ୍ର ସାଏ । ଆଜିର ଦିନରେ ଅର୍ଥାତ ୨୩ ଜାନୁଆରୀ ୧୮୦୯ ମସିହାରେ ସମ୍ବଲପୁରଠାରେ ଜନ୍ମଗ୍ରହଣ କରିଥିବା ସୁରେନ୍ଦ୍ର ସାଏ ୧୮୨୭ ମସିହାରେ ସମ୍ବଲପୁରର ଉତ୍ତରାଧିକାରୀ ପଦକୁ ନେଇ ଇଂରେଜମାନଙ୍କ ବିରୁଦ୍ଧରେ ଆନ୍ଦୋଳନ ଆରମ୍ଭ କରିଥିଲେ । ସୁରେନ୍ଦ୍ର ସାଏଙ୍କ ଅନୁଗାମୀମାନେ ଧନୁଶର ଧରି ଗରିଲା ଯୁଦ୍ଧରେ ଇଂରେଜମାନଙ୍କୁ ଅସ୍ତବ୍ୟସ୍ତ କରାପାଇଥିଲେ । ଏହି ଆନ୍ଦୋଳନ ୧୩ ବର୍ଷ ଯାଏଁ ଚାଲିଥିଲା । ୧୮୪୦ ମସିହାରେ ସୁରେନ୍ଦ୍ର ସାଏ ଇଂରେଜମାନଙ୍କ ହାତରେ ବନ୍ଦୀହେବାରୁ ଏହି ଆନ୍ଦୋଳନର ଯବନିକା ପଡ଼ିଥିଲା ।

ସୁରେନ୍ଦ୍ର ସାଏଙ୍କୁ ମାତ୍ର ପାଞ୍ଚ ବର୍ଷର ଜେଲ୍ ଦଣ୍ଡ ଦିଆଯାଇଥିଲେ ମଧ୍ୟ ତାଙ୍କର ଦଣ୍ଡ ଅବଧି ଶେଷ ହେବାପରେ ବି ତାଙ୍କୁ ଇଂରେଜମାନେ ମୁକ୍ତ କରିନଥିଲେ, କିନ୍ତୁ ୧୮୫୭ ମସିହାର ସିପାହୀ ବିଦ୍ରୋହ ସମୟରେ କିଛି ରାମଗଡ଼ର କିଛି ଜବାନମାନେ ଜେଲ୍ ଭାଙ୍ଗି ସାଏଙ୍କ ସମେତ ୩୨ ଜଣଙ୍କୁ ମୁକ୍ତ କରିଥିଲେ । ୧୭ ବର୍ଷ ପରେ ମୁକ୍ତ ହୋଇଥିବା ସାଏଙ୍କୁ ଧରାଇଦେବାପାଇଁ ଇଂରେଜ ସରକାର ସେ ସମୟରେ ୨୫୦ ଟଙ୍କାର ମୁଣ୍ଡ ଜାମିନ ମଧ୍ୟ ରଖିଥିଲେ ।

ମୁକ୍ତିପରେ ସୁରେନ୍ଦ୍ର ସାଏ ପୁଣିଥରେ ସମ୍ବଲପୁରବାସୀଙ୍କୁ ମେଳି କରି ପୁନର୍ବାର ପାହାଡ଼ ଉହାଡ଼ରେ ଲୁଚିରହି ଇଂରେଜମାନଙ୍କ ବିରୁଦ୍ଧରେ ସଂଗ୍ରାମ ଚଳାଇଥିଲେ । ସେ ସମୟରେ ଇଂରେଜାମାନଙ୍କର ଆଧୁନିକ ଯନ୍ତ୍ରପାତି ଆଗରେ ସମ୍ବଲପୁରବାସୀଙ୍କ ଧନୁତୀର, ବର୍ଚ୍ଛା, ଖଣ୍ଡା, ନିଆଁଧରା ବନ୍ଧୁକ ଆଦି ବିଶେଷ କିଛି କାମ ଦେବ ନାହଁ ବୋଲି ସେ ଗରିଲା ଯୁଦ୍ଧର ଆଶ୍ରୟ ନେଇଥିଲେ । ପରବର୍ତ୍ତୀ ସମୟରେ ୧୯୬୨ ମସିହାରେ ଇଂରେଜ ମେଜର ଇମ୍ପେଙ୍କ ଶାନ୍ତିପୂର୍ଣ୍ଣ ଆହ୍ୱାନକ୍ରମେ ସୁରେନ୍ଦ୍ର ସାଏ ଆତ୍ମସମର୍ପଣ କରି ସ୍ୱଭାବିକ ଜୀବନ ବଞ୍ଚିବା ଆରମ୍ଭ କରିଥିଲେ । କିନ୍ତୁ ଇମ୍ପଙ୍କ ମୃତ୍ୟୁପରେ ୧୯୬୪ ମସିହାରେ ସୁରେନ୍ଦ୍ର ସାଏଙ୍କୁ ଶୋଇଥିବା ଅବସ୍ଥାରେ ଗିରିଫ କରାଯାଇଥିଲା ଏବଂ ତାଙ୍କୁ ଆଜୀବନ କାରବାସ ଦିଆଯାଇଥିଲା । ୧୮୮୪ ମସିହାର ଫେବୃଆରୀ ମାସ ୨୮ ତାରିଖରେ ସୁରେନ୍ଦ୍ର ସାଏ ଆଜୀବନ କାରାବାସ କାଟୁଥିବାବେଳେ ଅସୁରଗଡ଼ ଦୁର୍ଗରେ ମୃତ୍ୟୁବରଣ କରିଥିଲେ ।